New Delhi, Jymmang:
Ka ïingbishar ha Delhi ha ka sngi Thohdieng ka la pynjlan tarik shuh shuh ha kaba ïadei bad ka jingset patok haduh ka 2 tarik, Jylliew ïa u nongïalam jong ka seng AAP u Manish Sisodia ha kaba ïadei bad ka jingdonkti ha ka kam bamsap kaba la mih na ka tnat Excise.
U Special Judge u MK Nagpal u la pynbna ban nang pynjlan sngi shuh shuh ha kaba ïadei bad ka jingset patok ïa u Sisodia hadien ba ïa une u Symbud Myntri barim jong ka Delhi la ïalam hakhmat ka ïingbishar hadien ba la kut noh ka por ban set patok ïa u kumba la pynbha ha shwa.
Ka ïingbishar ha ka 31 tarik, Lber ka la kyntait ban ai jamin ïa u Sisodia, ha kaba la ong ba u la long u snar nongïalam ha kaba ïadei bad ka jingïasuhbuit sniew ban bam tyngka ha kaba ka la kot sha ka T. 90-100 klur kaba la long sha u bad sha ki nongïarap jong u ha ka sorkar Delhi.
Ka kynhun CBI ka la kem ïa u Sisodia halor ka jingshah kynnoh ba u la bamsap ha kaba ïadei bad ka jingpyndkoh ïa ki rukom pyntreikam hapoh ka tnat Excise ha Delhi hapdeng u snem 2021-22.
