Srinagar, Jymmang:
Ka kynhun National Investigation Agency (NIA) ka la pynlong ïa ka jingleit khynra sha kiba bun ki jaka kiba don ha Pulwama bad Shopiam kiba don ha ki bynta ba shaphang Shathie jong ka Kashmir kum shi bynta ban pynlong ïa ka jingtohkit ha kaba ïadei bad ka jingdon jong ka jingjia thong pisa na ka bynta ban pynjur ïa ki kam pyntriem jong ki lehnoh.
Kane ka jingjia ka la mih ha kaba ïadei bad ka jingbei tyngka halor ki kam pyntriem bad ka jingdon jong ka jingïasuhbuit sniew ïa kaba la lah ban pynlong kam da ki kynhun lehnoh bapher bapher, hadien ba ki la ïoh hukum na ki nongïalam jong ki kynhun lehnoh kiba na Pakistan.
Ha ka 11 tarik, Jymmang, ka kynhun tohkit ka la pynlong ïa ka jingleit khynra ha ka jaka sah jong u Abdul Khaliq Regoo ha Kansipora, jong u Javid Ahmad Dhobi ha Syed Kareem bad jong u Shoaib Ahmad Choor ha Sangri Colony kaba don ha Baramulla distrik ha kaba ïadei bad ka jingjia jong ka jingïasuhbuit sniew.
Kane ka jingpyntreikam jong ka kynhun NIA ka la long khyndiat taïew hadien ba la jia ka kam thombor bashyrkhei jong ki lehnoh ha Poonch ha kaba ka la shim ïa ka jingim jong ki san ngut ki shipai.
Khyndiat sngi hadien ba la jia ka kam thombor ha Poonch, ki la don kumba san ngut ki shipai kiba la shah pynïap ha ki lehnoh kiba la shah khang kdong ha ki shipai ha kaba ki la pyndonkam da u bom uba khlaiñ bor ha kawei ka jaka kaba long khlaw kaba don ha Rajouri distrik jong ka Jammu & Kashmir.
Uwei u heh shipai u la mynsaw ha ka por ba la don ka jingpynbthei jong ki lehnoh ïa u bom Improvised Explosive Device (IED) uba khlaiñ bor. Hashwa kane, ka kynhun NIA ka la kurup noh ïa ki jingdon jingem jong ki lai ngut ki briew kiba la shah kynnoh donkti ha ka kam beaiñ ha kiba bun ki jaka kiba don ha Kashmir hapoh ka jingtreikam jong ka Unlawful Activities Prevention Act hadien ba la ïoh hukum na ka ïingbishar.
Ka kynhun NIA ka la pynlong ïa ka jingleit khynra ha Jammu & Kashmir halor ka jingthmu ban lah ban pyntroiñ ïa ki kynhun bathymmai jong ki lehnoh kum ka The Resistance Front (TRF), United Liberation Front Jammu & Kashmir (UL J&K), Mujahideen Gazwat-ul-Hind (MGH), Jammu & Kashmir Freedom Fighters (JKFF), Kashmir Tigers, PAAF bad kiba bun kiwei pat. Kine ki kynhun pyntriem ki la mih hadien ba ka la don ka jingpynduh pyndam ïa ka bhah bakyrpang ha Jammu & Kashmir kaba la long ha ka 5 tarik, Nailar, 2019.
Kine ki kynhun lehnoh ki la shim ka jingkitkhlieh na ka bynta ban leh ïa kiba bun ki kam pyntriem jong ki lehnoh ha kine ki lai snem ba la leit, khamtam ha ka thaiñ Pir Panjal jong ka Jammy. “Na ka jingpynlong ïa ka jingtohhkit la paw ba ki kynhun lehnoh kiba ha Pakistan ki la pyndonkam da ki Drone na ka bynta ban pynpoi ïa ki tiar siat, ki bom, ki drok bad kiwei pat sha ki dkhot jong ki kynhun lehnoh bad ki briew ba ki la ju ïatreilang ha Kashmir, ” la ong ka jingthoh kaba la wan na ka kynhun tohkit. Ki heh jong ka kynhun tohkit ha ryngkat ka jingïatreilang jong ki pulit, ki shipai, ki la pynlong ïa ka jingleit khynra sha kiba bun ki jaka kiba don ha Srinagar, Baramulla, Shopian, Kulgam, Anantnag, bad Budgam distrik jong ka Kashmir, kumjuh ha Poonch, Rajouri bad Kishtwar distrik jong ka Jammu tang ha une u bnai.
