Srinagar, Jymmang:
Ki shipai ïada ri ha ka sngi U Blei ki la pynjulor noh ïa ka ktem jong ki lehnoh hadien ba ka la don ka jingïasiat kaba markylliang bad ki lehnoh ha Anantnag distrik kaba don ha Jammu & Kashmir, la ïathuh ki pulit.
Ki shipai ïada ri ki la pynlong ïa ka jingleit kerkut bad leit thwet lehnoh ha Andan kaba don ha ka thaiñ Sangam jong ka disrik hadien ba la ïoh jingtip shaphang ka jingdon jong ki lehnoh ha kane ka jaka, la ïathuh u heh pulit.
U heh pulit u la ïathuh ba ka kynhun jong ki lehnoh ka la siat pyrshah ïa ka kynhun shipai bad nangne ka la mih ka jingïasiat kaba markylliang.
Ki lehnoh ha katei ka por ba la don ka jingïasiat ki la ïohlad ban phet bad mynta ka la don ka jingleit thwet kaba jur ban ïohkem ne ïoh ban siat ïa ki.
Ha ka por ba la pynlong ïa ka jingleit thwet lehnoh, ki shipai ki la lap ïa kawei ka ktem jong ki lehnoh bad la pynjulor noh ïa ka, la ïathuh u heh pulit.
Kumba la ïathuh ka tyllong khubor, la ong ba ym shym la don mano mano ruh ban ïap ha ka jingjia na baroh arliang, la ïathuh shuh shuh u heh pulit.
Ki shipai ki dang bteng ban pynlong ïa ka jingleit thwet lehnoh ha kane ka thaiñ halor ka jingthmu ban lah ban pynduh pyndam ïa ki lehnoh ha ka thaiñ.
