Thiruvananthapuram:
Ki pulit jong ka Kerala ha ka sngi U Blei ki la kem ïa ki 8 ngut ki briew kiba la donkti kumba la pynshisha ba ki la pynïap ïa uwei u briew uba la 36 snem ka rta uba na Bihar halor ka jingsuba ba u la tuh.
Ki pulit ki la ong ba u Rajesh Manji u la shah bom ïap ha ki nongshong shnong kiba la ïohbat ïa u ha ka por ba u la hap najrong ïing hajan Kondotty.”Ki nongshong shnong ki la pynshisha da kaba ong ba u la hap najrong ïing ha ka por 12.30 mynstep jong ka sngi Saitjaiñ. U la shah bat bad shah teh ha ki nongshong shnong halor ki kam sniew jong u,” la ïathuh ki pulit.
Ki pulit ki la kem noh ïa ki 8 ngut ki nongshong shnong jong ka thaiñ ha kaba ïadei bad ka jingdonkti jong ki ban pynïap briew. U heh jong ka tnat pulit ha Malappuram u Sujith Das ha ka jingïakren bad ki nongthoh khubor u la ong ba ki la don ki sabud ba ki la thombor beiñ ïa une u lanot.
“Kine kiba la shah kynnoh ki la pyrshang ban pynduh pyndam noh ïa ki sakhi ba la ïohlum. Ki la pyrshang ban pynkhuid bad pyndam noh ïa ki Video ba la ïohring lyngba ka CCTV. Ngi la ïoh lut ïa baroh. Kumba ka long mynta ki la don kumba 8 ngut ki briew kiba la shahkem bad sa uwei u briew u la shah set patok halor ka jingthmu jong u ban pynduh pyndam ïa ki sabut ba la ïoh,” la ong u Das. U la ong ruh ba ha ka por ba la pynlong ïa ka jingtohkit kaba hashwa, la ong ba une u lanot u la don ha kane ka shnong halor ka jingthmu ban leit tuh. La buh bad thaw ïa ka kynhun ka ban pynlong ïa ka jingtohkit ha kaba ïadei bad ka jingjia, ha kaba ka la don ka jingbuh jingmudui halor ka kam pynïap briew ïa kaba la pynngat hapoh ka kyndon 342 jong ka Indian Penal Code.
Ki pulit ki la ïathuh ba une u nongshong shnong jong ka Bihar u la khlad hashwa ban pynpoi ïa u sha ka jaka ai jingsumar, bad ong ba kine kiba la shah kynnoh ki la pyndonkam da ki Pipe plastik bad ki dieng ha ka ban bom ban tied ïa u. Ïa ka metïap jong une u lanot la aiti sha ki bahaïing jong u hadien ba la dep ban leh ïa ka Post-Mortem.
