New Delhi, Jymmang:
Ka ïingbishar ha Punjab ka la khot hajir ïa u President jong ka seng Congress u Mallikarjun Kharge halor ka jingkular ka seng jong u ban khang ïa ka kynhun ïaleh jong ka seng Bajrang Dal ha Karnataka.
Kumba la ïathuh ka tyllong khubor, la ong ba ka ïingbishar ha Sangrur kaba don ha Punjab ka la khot hajir ïa u heh nongïalam jong ka seng Congress ha kaba ïadei bad ka jingdon bynta jong u ban pynkhlemraiñ ba la mudui da u Hitesh Bhardwaj, uba long u nongseng jong ka Hindu Suraksha Parishad, pyrshah ïa u Kharge namar ka jingkren beaiñ ïa ka seng Bajrang Dal ha ka por ba la pynkit ïa ka ilekshon ha Karnataka.
Ha ka jingphah jingkyrpad jong u hakhmat ka ïingbishar, la ong ba u Bhardwaj u la ong ba ka seng Congress, ha ka mat treikam jong ka kaba la pyllait na ka bynta ka Karnataka, ka la pynïanujor ïa ka seng Bajrang Dal bad ka seng kaba long pyrshah ïa ka ri kum ka kynhun SIMI bad Al-Qaeda.
Ha ka jingpyllait ïa ki mat treikam ha ka por ba la don ka ilekshon Assembly ha Karnataka, ka seng Congress ka la kular ban pyntreikam ha ka ban khang ïa ki seng kum ka PFI bad Bajrang Dal.
Ka mat treikam ba la wanrah bad buh da ka seng Congress na ka bynta ka Karnataka ka la ong ba kan sa pyntreikam pyrkhing pyrshah ïa ki seng kum ka Bajrang Dal kaba ju wanrah ïa ki jingïashun hapdeng ki kynhun bapher bapher.
Ka la kular ban ïada ïa ki rit paidbah na ka jingkhie ki thma paidbah bad ki jingshah kynnoh ki bym don nongrim.
Ka la pynpaw ïa ka kyrteng jong ka seng Popular Front of India (PFI), kaba dei ka kynhun jong ki Muslim kaba la shah khang namar ka jingdonkti bad ki lehnoh, ha ryngkat ka Bajrang Dal, kaba ju buh ïa ki aiñ ha kti lajong, ka jingthombor bad don bynta ha ki kam thombor, bad kiwei pat ki jingleh jingkam.
Ha kaba ïadei bad ka jingkynthoh kaba la wan na ka seng BJP kaba bat ïa ka jingsynshar, kynthup na u Myntri Rangbahduh u Narendra Modi, la ong, ka seng Congress ka la batai shai ha kaba ïadei bad ka jingkular, ha kaba la ong ba kam shym la don kano kano ka jingpynbna ne tyrwa na ka bynta ban khang ïa ka Bajrang Dal namar ka jingkhang ïa kano kano ka seng halor ki rukom treikam jong ki ka long beit hapoh ka jingai rai jong ka sorkar kmie.
Ha kaba ïadei bad kane, ka seng Congress ka la thalaiñ kylla ïa u Myntri Rangbahduh, ha kaba ka la kynnoh ïa u ba u la ktah ïa ka jingsngew ha kaba ïadei bad ka jingngeit niam jong ki nongbud jong u da kaba shim ïa ki kyntien jong u Lord Hanuman bad ka Bajrang Dal, bad dawa ka jingpan map na u.
Ha kaba ïadei bad kane, na ka liang ka seng Bajrang Dal kam shym la don ka jingsheptieng halor ka jingbyrngem jong ka seng Congress ban khang ïa ka ha Karnataka, la ong u nongseng jong ka Vishwa Hindu Parishad (VHP).
“Lada ki kwah ban khang ïa ka Bajrang Dal namar ka jingshun jong ki ïa ka niam Hindu, ngin sa shim ïa ki sienjam kiba donkam,” la ong u General Secretary jong ka VHP u Milind Parande ha Indore.
