Mumbai, Jymmang:
Ka kynhun Shiv Sena ba la lamkhmat da u Uddhav Thackeray ba la tip ruh kum ka (UBT) ha ka sngi U Blei ka la pynbna ba kan sa pynlong ïa ka jingïakhih ha Delhi pyrshah halor ka rukom lum pisa bai rung na ka bynta ki nongleit ïaid riewblei kiba thmu ban leit jngoh ïa ka jaka kyntang ha Amarnath kaba don ha ki bynta ba shaphang Shathie jong ka Kashmir.
Ka jingpyntreikam ha kaba ïadei bad ka jingpynrung kyrteng na ka bynta ar bnai ka Amarnath Yatra ka la sdang naduh u bnai ba la lah.
Kane ka jingïaid riewblei kaba ju long manla u snem ka la dei ban sdang ha ka 1 tarik, Naitung na ki ar tylli ki lynti kawei kaba jngai kumba 48-kilometre ba la tip kum ka Nunwan-Pahalgam ha Anantnag distrik bad kawei pat kaba jngai kumba 14-kilometre hynrei kane ka lynti ba la tip kum ka Baltal kaba don ha Ganderbal distrik ka long kaba khohruh khohram.
“Ngin sa pynlong da ka jingïakhih ha Jantar Mantar ha Delhi ha kine ki sngi ban wan kum shi bynta ban pynpaw ïa ka jingpyrshah jur ha kaba ïadei bad ka jingphah pyllait ei ka bai rung na ka bynta ki riewngeit,” la ong u heh nongïalam jong ka seng ha Jammu & Kashmir u Manish Sahni ha ka jingïakren bad ki nongthoh khubor.
Kiba bun na ki heh nongïalam jong ka seng, ki heh nongïalam niam bad ki riewsaiñ pyrthei ki la rai ban ïanohktilang ha kane ka jingïakhih na ka bynta ban dawa ha ka ban phah weng noh ïa ka rai ban phah siew bai rung ïa ki nongleit ïaid riewblei.
“Ngi buh ka jingkyrpad ïa u Lt Governor jong ka Jammu & Kashmir bad ïa ka kynhun ba dei khmih ïa ka jaka kyntang ba kim dei ban phah siew bai rung ïa ki nongleit ïaid riewblei. Ngi kwah ba ki nongleit ïaid riewblei kin lait na ka jingshah siew khajna ruh,” u la ong.
U Sahni u la ong ba ka kynhun nongmihkhmat jong ka seng jong u ka la leit ban ïakynduh ïa u heh nongïalam jong ka Yuva Sena u Aditya Thackeray ha Mumbai ha ka sngi Palei bad u la batai shai ha kaba ïadei bad ka jingthmu ban pynlong ïa ka jingïakhih.
Ki heh jong ka kynhun nongïalam jong ka seng ki la ai jingmut ba la dei ban nang pynkhlaiñ ïa ka jingïakhih haduh ban da ai rai halor ka jingdawa, la ong u Sahni.
