New Delhi, Jymmang:
U MP jong ka seng Congress u Adhir Ranjan Chowdhury u la ong ba ka seng jong u kan sa ïashim bynta ha ka jingïakhun pyrshah ïa ka seng Trinamool Congress kaba bat ïa ka jingsynshar ha West Bengal wat lada ka Myntri Rangbah ka Mamata Banerjee ka la pynpaw ba ka lah ban ai jingkyrshan ïa ka seng.
U Chowdhury u la pynpaw ba um sngew ïahap bad ka jingpynbna jong ka Myntri Rangbah jong ka West Bengal ka Mamata Banerjee ba ka seng Trinamool Congress kan ai ka jingkyrshan ïa ka seng Congress ha kaba ka la kham khlaiñ hynrei kan ym ïakhun pyrshah ïa ka Bengal.
Kum ka jingai jubab halor ka jingkren jong ka, u Chowdhury u la ong, “Ngin sa ïakhun ïa ka ilekshon; ngin sa ïakhun lada donkam.”
U Chowdhury u la kynnoh ba ka Mamata Banerjee ka la kren ïa kitei ki ktien naba ka la ïohi ba ka seng Congress ka la jop ha ka jingïakhun ïa ka ilekshon ha Karnataka, ha kaba ka la sngew ba lada kam ïatreilang bad ka seng Congress kan ym lait im.
“Na ka jingjop jong ka seng Congress, ka Mamata Banerjee mynta ka la sngew ba kan ym lah ban leh ei ei lada kam ïatreilang bad ka seng Congress, hashwa ka ilekshon ha Karnataka phi la ju ïohsngew ba ka Mamata Banerjee kan ong ai ka jingkyrshan na ka bynta ka seng Congress ban pynrem ïa ka BJP?
Ka dei kajuh ka Mamata Banerjee kaba la leit jngoh ïa ka Bihar bad Uttar Pradesh ban leit ai jingkyrshan ïa kito kiba ïakhun pyrshah ïa ka seng BJP, hymrei ka bym leh kumta haba ka leit jngoh ïa ka Karnataka ban kyrshan ïa ka Congress?” la kylli u Chowdhury.
U Chowdhury u la kynthoh ïa ka Myntri Rangbah jong ka Bengal naba ka la leh jngai bad kyntait ïa u Rahul Gandhi hadien ka jingjop ka seng ha Karnataka bad ha ka por ba don ka Bharat Jodo Yatra bad kam shym la pynmih wat tang shi kyntien ruh ïa ka kyrteng jong u Rahul Gandhi hadien ba ka seng ka la ïoh ïa ka jingjop ha ka jingïakhun ïa ka ilekshon Assembly ba dang shen ha Karnataka.
