Chandigarh, Jymmang:
Ki shipai jong ka tnat Border Security Force ki la lap ïa u Heroin ba 15.5 kilo hadien ba ki la lap ïa kawei ka Drone kaba la her ha ki bynta jong ka ri na Pakistan ha ki bynta khappud ha Punjab hynnin ka sngi. U heh shipai jong ka tnat BSF u la ong ba ki shipai ki la siat ïa kane ka Drone ha ka shnong Kakkar kaba don ha Amritsar distrik.
Ha ka por ba la pynlong ïa ka jingleit khmih bniah, la lap ïa ar tylli ki song kiba don ïa ka jingkhia kaba 15.5 kilo. Kane ka jingïoh ban kurup ïa une u jingdih pynbuaid ka la long ha ka sngi ba la don ka jingïakynduh kaba kyrpang jong ki shipai BSF bad ki pulit jong ka Punjab, la ïathuh ki heh pulit ha Amritsar.
Ïa kane ka jingïalang la khot na ka bynta ban pynlong ha ka ban ïoh ban ïakren sani bha ha kaba ïadei bad ki jingbym shngaiñ jong ka jingwan her jong ki Drone ïa kiba la shah pyndonkam na ka bynta ban wan pynhap drok, ki tiar siat bad ki tiar pynbthei ha ki bynta khappud.
Ka Punjab ka la ïasam ïa ka bynta khappud kaba palat 500-km ha ki bynta ba shakhmat jong ka Pakistan ha kaba la pahara da ki shipai ka tnat BSF bad ki Drone bad ki Unmanned Aerial Vehicles (UAVs) ki la her sha ki bynta jong ka ri ha ryngkat u drok bad ki tiar siat ha kaba kane ka la long ka bynta kaba sngewkhia haduh katta katta na ka bynta ki kynhun ïada ri ha palat kine ki saw snem ba la leit.
