New Delhi, Jymmang:
Uwei u briew ïa u bym shym la lah ban ithuh u la phah ïa ka khubor byrngem pynïap lyngba ka Landline Number jong u Myntri ka sorkar kmie u Nitin Gadkari ha ka jaka sah jong u kaba don ha Motilal Nehru Road ha Delhi, la ïathuh ki pulit ha ka sngi Ba-ar.
Ïa katei ka khubor la ïoh ban pdiang da u nongtrei jong ka jaka treikam jong u Gadkari ha ka miet jong ka lah sngi U Blei. Utei uba la phah ïa ka khubor um shym la batai bniah shaphang ïalade bad u la pynpaw ba u la kwah ban kren ïa u Myntri bad byrngem pynïap ïa u, la ïathuh u heh pulit.
“Utei uba la phone u la kren ha ka ktien Hindi bad ong, “Nga kwah ban kren ïa u Myntri bad nga kwah ban byrngem pynïap ïa u, bad u la pyllip noh ïa ka phone,” u la ong.
Ka jaka treikam jong u Myntri ka la phah jingtip halor kane ka jingjia sha ki pulit jong ka Delhi ha kaba mynta ka dang ïai bteng ban pynlong ïa ka jingtohkit.
“La dep ban sngap bad bishar halor ki jingtip ba bniah. Une uba la shah kynnoh u la phone ha ka Landline Number kumta mynta ka la don ka jingkhmih bniah ïa ka ‘number’ ba la pyndonkam da u runar. Ka jingtohkit ha kaba ïadei bad kane ka dang ïai bteng,” la bynrap sa uwei pat u heh pulit.
Kum ban shu pynkynmaw, la ong ba ka jaka treikam jong u Myntri kaba don ha Nagpur ka la ïohpdiang teng ïa kum kane ka khubor pyntriem la ar sien shwa ha une u snem.
Ka kynhun National Investigation Agency (NIA) ka la leit sha Nagpur ha ka 9 tarik, Jymmang na ka bynta ban pynlong ïa ka jingtohkit ha kaba ïadei bad ka jingjia.
Ïa kine ki Call la pynshisha ba la phone da uwei u runar uba la shah rai pynrem ha kaba ïadei bad ka kam pynïap briew jong u, u Jayesh Pujari ba la tip ruh da ka kyrteng kum u Kantha, u la shahkem na ka patok kaba don ha Belagavi, Karnataka, bad u la shah pynngat hapoh ka kyndon UAPA, la ïathuh ki pulit.
