Srinagar, Jymmang:
Ki la don kumba arngut ki lehnoh jong ka kynhun Hizb kiba la shahkem ha ki pulit jong ka Jammu & Kashmir ha ka sngi Ba-ar ha kaba ïadei bad ka jingjia jong ka jingpynïap ïa u Mirwaiz Farooq.
Kine ki arngut ki la shah kem 33 snem hadien ba ki la pynïap ïa u Mirwaiz Mohammad Farooq ha ka 21 tarik, Jymmang jong u snem 1990.
U Special DG CID Jammu and Kashmir u R R Swain u la ïathuh ha ki nongthoh khubor ba na ki san ngut kiba la shah kynnoh donkti ha ka jingjia, saw ngut ki dang phet rieh.
Uwei na ki runar uba la lamkhmat halor ka jingjia bad uwei pat uba la shah kynnoh ïa kiba la tip kyrteng kum u Abdullah Bangaroo bad u Ab Rehman Shigan – ki la shah pynïap ha ka por ba la don ka jingïasiat.
Sa uwei pat uba la shah kynnoh ïa uba la tip kyrteng kum u Ayub Dhar u la shah rai pynrem ha ka TADA Court jong ka Jammu and Kashmir ha u snem 2010 bad ki la shah rai pynrem ha ka ïingbishar ba kin shong patok shirta jingim.
“Ki la don kumba saw ngut kiba la shah kynnoh kiba dang phet rieh na ki kti jong ka aiñ. Uwei na ki nonglam khmat ha ka jingjia, Jammu and Kashmir ïa uba la tip kyrteng kum u Abdullah Bangaroo u la ïap ha ka jingïasiat bad ki pulit. Sa uwei ruh uba la shah kynnoh donkti ïa uba la tip kyrteng kum u Ab Rehman Shigan u la shah pynïap ha ka jingïasiat bad ki pulit,” u la ong ha ka jingïakren bad ki nongthoh khubor.
“U Javed Bhat ba la tip ruh da ka kyrteng kum u Azmat Khan bad u Zahoor Bhat ba la tip ruh da ka kyrteng kum u Bilal ki la lait phet na kti jong ki pulit. U la dei u Zahoor uba la sdang ïa ka kam hadien ba u la ïoh ban rung hapoh ka kamra thiah jong u Mirwaiz,” u la ïathuh ha ki nongthoh khubor.
U la ong bad ka jingïoh kem ïa kine ki arngut kiba dang sah, “baroh ki la don san ngut kiba la shah ban ïalam hakhmat jong ka aiñ.” Kine ki arngut kiba la shah kynnoh kin sa shah bishar bniah.
U Chairman jong ka All Jammu and Kashmir Awami Action Committee, u Mirwaiz Farooq u la shah pynïap ha ki lehnoh jong ka kynhun Hizb ha ka jaka sah jong u kaba don ha Nageen, Srinagar ha ka 21 tarik, Jymmang, 1990.
