Amaravati, Jymmang:
Ka sorkar jylla ka la nang ïai bteng ha kaba ïadei bad ka jingshim ïa ki sienjam baroh ha kaba ïadei bad ka jingthmu ban khanglad ïa ki kam khaïi drok bad Ganja na Andhra Pradesh. Hapoh ka jingpynlong ïa ka jingleit khynra, la ïoh ban kurup ïa shibun u Ganja na kylleng ki jaka.
Ki pulit jong ka Andhra Pradesh ki la buh da palat 2,500 tylli ki jingujor hapoh ka Narcotics Drugs and Psychotropic Substances (NDPS) Act pyrshah ïa ki nongkhaïi Ganja bad ïa ki nongpynïaid ïew ïa u haduh u snem ba la lah.
Kumba la ïathuh da ki pulit, la ong ba ka jingdon jong kim kine ki jingjia haduh mynta ka la long arshah haba ïanujor bad ki 928 tylli ki jingjia ba la jia ha ki snem ba la lah. ka jingnang kiew ha kaba ïadei bad kajingïoh ban kurup ïa u Ganja bad ka jingïohkem ïa ki nongkhaïi tuh bad ki nongpynïaid iew ka la pynlong ba dei ban buh noh da ka Special Enforcement Bureau (SEB) na ka bynta ban lah ban tehlakam ïa kine ki kam sniew.
Ka kynhun SEB, ha ryngkat ka jingïatreilang bad ki pulit, ka la ïaleh ban pynduh pyndam ha kaba ïadei bad ka jingdon jong ki kam khaïi ïa u Ganja bad ki drok ha ka jylla. Na ki 13 tylli ki distrik kiba don hapoh ka jylla, la ong ba ka Visakhapatnam ka la paw ba ka la long hakhlieh eh ha kaba ïadei bad ka jingdon jong kum kine ki jingjia ha kaba ki la don kumba 972 tylli kiba la long pyrshah ïa ki nongkhaïi, ki nongshalan tuh bad ki nongpynïaid ïew ïa u Ganja, ha kaba hadien kane la bud da ka East Godavari da 319 tylli, ka Guntur da 138 tylli, ka Chittoor da 107 tylli bad ka Krishna da 98 tylli. Ka kynhun Enforcement Bureau ruh ka la buh da saw tylli ki jingujor pyrshah ïa kito ki nongkhaïi ïa ki drok kum ïa u LSD, MDMA, Zolpidem 50 mg bad Tramadol.
Ki la don baroh kumba 1,405 tylli ki kali ïa kiba la pyndonkam ha ka ban kit ïa u Ganja da ki nongkhaïi ïa kiba la ïoh ban kurup ha ka por ba ki pulit bad ki heh ka kynhun SEB ki la pynlong ïa ka jingkhynra ha ka jylla. Kiba bun na kiba la shah kynnoh donkti ha ka jingkhaïi ïa u Ganja bad ïa u drok ki dei kiba dang don ha ka rta kaba hapoh 30 sem ka rta bad kiba la pep skul shiteng por, la ong ka kynhun SEB.
