Jammu, Jymmang:
U nongïalam jong ka seng Bharatiya Janata Party u Devender Singh Rana ha ka sngi Ba-ar u la kren shai shaphang ka jingthmu ban pynlong ïa ka G20 ha Kashmir kham hadien ha une u bnai namar kane ka long ka lad na ka bynta ban buh ïa ka Jammu & Kashmir ha ka bynta jong ki kam jngohkai pyrthei ha kaba kan sa lah ban kyntiew ha ka liang ka ïoh ka kot hapoh ka thaiñ bad ka jing-leit jngoh jong kiba bun ki nongleit ïaid riewblei ha Union Territory.
” Kito kiba pyrshah ïa ki jingbuh ïa kino kino ki prokram ha Kashmir bad pyrthuh kumba leh ka Pakistan ki la dei shisha ki nongshun jong ka ri bad jong ka jingïoh jingmyntoi jong ki briew jong ka J&K,” la ong u Rana ha ka por ba u la ai jingkren sha ki Convener bad ki Co-Convenor jong ka Trade, Industries, Transport, Cooperative and Tourism Cells jong ka seng BJP ha ka jaka treikam jong ka seng ha kane ka sngi.
U la ong ba ka jingleh jingkam ha Jammu & Kashmir ka don ha ka bynta ban kyntiew ïa ka ri na ka jingdon jong ki katto katne ki jingeh kiba la mih na ki riewshim kabu ki bym kwah ba ki briew kin ïoh ban kynshew spah bad ba kin kiew.
Kine ki kwah ba ka UT kan sah ha ka jingshah tap ha ki jingeh bad ki jingjynjar ha kaba ïadei bad ka kam saiñ pyrthei, bad ki la buh ka jingshaniah ha ki paidbah.
Ha ka jingkhmih bniah la shem ba ka jingleh jong kine ki briew ka la paw ba kim kwah ban wanrah ïa ki kam pyntroi ha ka jylla kaba mynshwa wat lada ki la don shibun ki jingïarap kiba la wan na ka sorkar kmie.
Ki jingñiewbeiñ, ki kam bamsap bad ka jingbym biang ka jingsynshar ki la long ki daw kiba la ktah ïa ka roi ka par ha J & K.
Mynta ba ka UT ka la don ha ka bynta jong ka jingsuk, ka jingtyllun ha ki jingpyntreikam bad ka ïoh ka kot, haba la ïohi ïa kane, ki la sdang ban wad jaka na ka bynta ban wad jingmyntoi ha ka liang ki kam saiñ pyrthei, u la bynrap.
