Amaravati, Jymmang:
U Myntri Rangbah jong ka Andhra Pradesh u Y S Jagan Mohan Reddy ha ka sngi Palei u la hukum ïa ki heh ba dei khmih ba ki la dei ban pynkhreh ïa ka jingpyntreikam na ka bynta ban shna ïa ki ïing bad ban aiti ïa ki sha kito kiba dei ban ïoh jingmyntoi hadien ba la dep ban sam ïa ki dulir sha ki briew ki baduk kiba dei ban ïoh jingïarap ha ka thaiñ Amaravati.
Ha kaba ïadei bad ka jingkhmih bniah halor ka prokram ban pynshna ïing ka sorkar ïa ki briew ki baduk, u Myntri Rangbah u la hukum ïa ki heh ba dei khmih ba ki dei ban khmih bniah na ka bynta ban shna ïa kine ki ïing na ka bynta ki briew ki baduk khnang ba kin dup ïoh kham kloi ïa ki ïing ba kin shong kin sah.
“Katba nang dep ban shna kloi ïa ki ïing bad ai noh ban sah na ka bynta ki briew ki baduk, kan nang kham bha na ka bynta jong ki,” la ong u Reddy ha ka jingthoh kaba u la pyllait.
Ha kaba ïadei bad kane, ki heh ba dei khmih ki la pyntip sha u Myntri Rangbah ba ki la don kumba 5,024 tylli ki ïing kiba shah kynthup hapoh ka Andhra Pradesh Township And Infrastructure Development Corporation (APTIDCO) kiba la pynkhreh na ka bynta ban aiti ha ka ban shna ha ki jaka ba la mang na ka bynta ki briew ki baduk ha ka thaiñ, ki dei kiba la dep pyntreikam bad ïa ki dulir ruh la dep ban pynkhreh nadong shadong na ka bynta ban sam sha kiba dei ban ïoh.
Shuh shuh kumba la ïathuh ki heh ba dei khmih, la ong ba ki la don kumba 3.7 lak tylli ki ïing ïa kiba la dep ban shna na ka bynta ki briew ki baduk ki dei shi bynta jong ka ‘Navaratnalu’ Scheme jong ki 9 tylli ki prokram ai jingmyntoi bapher bapher katba ka jylla ka la pynlut kumba T. 1,085 klur ha kaba ïadei bad ka jingshna ïa kine ki ïing ha ki 45 sngi ba la leit.
Shuh shuh la ïathuh ba ka jingshna ïa ki 5 lak tylli ki ïing yn sa lah ban pyndep ha ki 45 sngi katba 8.6 lak tylli na ki ki dang don hapoh ka jingshna.
La ïathuh ba ka jingpyntreikam ka dang ïai bteng na ka bynta ban lah ban ai ïa ki lad jingmyntoi sha ki kynthei kiba dei ban ïoh jingïarap lyngba ka Loan, wat lada ki la don palat 11 lak ngut ki kynthei kiba la ïoh ïa ki Loan na ka Bank haduh T. 35,000 katba ka jingmang ba la dep hapoh ka jingtreikam jong ka ‘Pavala Vaddi’ MSME Scheme ka la kiew sha ka T. 3,887 klur.
