Patna, Jymmang:
Ki la don kumba 36 ngut ki khynnah kiba la kem pang hadien ba la lap ïa ka ‘ñiangbshiah na ka jingbam sngi jong ki ha kawei ka skul sorkar kaba don ha Saran distrik kaba don ha Bihar.
Ïa kane ka khñiang la lap da uwei u khynnah skul ha ka pliang jong u. Kane ka jingjia ka dei kaba la jia ha ka sngi Palei haba ki khynnah ki la ïoh ïa ka jingbam sngi ha ka skul sorkar.
Haba une u khynnah u la lap ïa kane ka khñiang ha ka pliang jong u u la leit ba pyntip mar mar sha ki nonghikai bad ki nongpynïaid kiba dei khmih ïa katei ka skul.
Hadien kane, ki bor pynïaid skul ki la khang bad pynsangeh ïa ki khynnah ba kin bam ïa ka jingbam ba la sam sha ki.
Ki khynnah ïa kiba la ud shitom hadien ba ki la bam ïa katei ka jingbam ki la shah pynkit sha ka jaka ai jingsumar ka Sadar Hospital, ha kaba kine mynta ki la lait na ki jingma.
“Ki 36 ngut ki khynnah ki la kham khlaiñ bad lait na ki jingma,” la ong u Dr Santosh, jong ka Sadar Hospital. Ha kaba ïadei bad kane, ki bor pynïaid distrik ki la ïoh jingtip halor kane ka jingjia na katei ka skul. U Sub-Divisional Magistrate (SDM) Sanjay Kumar Rai u la leit sha ka jaka ai jingsumar na ka bynta ban leit jngoh ïa ki khynnah kiba la kem pang.
“Ki la don kumba 40 ngut ki khynnah skul kiba la bam ïa katei ka jingbam, ha kaba 36 ngut napdeng jong ki ki la kem pang. Ïa ka jingpyntreikam yn sa ïaid shakhmat ban pynshitom pyrshah ïa ki nongtrei mon sngewbha kiba la sam ïa kane ka jingbam sha ki khynnah jong ka skul sorkar,” la ong u SDM.
U Headmaster jong katei ka skul u Suman Kumari u la ong, “Ka kynhun ki nongtrei mong sngewbha ka la wanrah ïa ka jingbam na ka bynta ki khynnah skul. Uwei u khynnah u la ïoh ïa ka ñiangbshiah na ka pliang jong u. Hadien kane, la shem ba ki la don kumba 36 ngut ki khynnah kiba la sdang ban ud shitom. Ngi la pynkit mar mar ïa ki sha Sadar Hospital. Kine ki la kham koit mynta. “
Ha ka 16 tarik, Naitung, 2013, ki la don kumba lai ngut ki khynnah kiba la ïap hadien ba ki la dep ban bam ïa ka jingbam sngi kaba la sniew na ka jingdon ka dawai pynïap khñiang ha kawei ka skul Primary ha Mashrakh ha Saran distrik.
