Jaipur, Jymmang:
Ki nongkyrshan jong u Myntri Rangbah jong ka Rajasthan u Ashok Gehlot bad ki jong u Sachin Pilot ha ka sngi Palei ki la ïa kajia para ma ki ha shwa ban sdang ka jingïalang bad ki nongbud jong ka seng ha Ajmer, la ïathuh ki pulit.
Kane ka jingïalang ka la dei ban long ha ka thaiñ Vaishali Nagar jong ka nongbah Jaipur hashwa ban don ka jingïalang ha kaba la thmu ban pynïaid da ka Amrita Dhawan kaba long ka nongpynïaid jong ka AICC ha Rajasthan.
Kumba la ïathuh u SHO jong ka jaka treikam jong ki pulit ha Christianganj u Karan Singh, ki nongbud jong baroh arngut ki nongïalam ki la ïakajia halor ka jingïaknieh jaka shong, ha kaba kane ka la wanrah ïa ka jingïakynad.
“Ka dei ka jingïalang jong ki nongkitkam jong ka seng ha kaba ki nongkyrshan jong u Chairman jong ka Ajmer Saras Dairy u amchandra Chaudhary bad u Chairman jong ka RTDC u Dharmendra Rathore ki la wan ïashim bynta. Kine ki la sdang ban pyrta da ki kyntien kiba pyrshah kawei ïa kawei pat ka kynhun, ha kaba kane ka la wanrah ïa ka jingïakynad kaba jur,” la ïathuh u President jong ka seng Congress ha ka nongbah u Vijay Jain.
U SHO Karan Singh uba la don ha katei ka jaka ha katei ka por, u la ong ba ki pulit kiba la don ha katei ka jaka ki la tem ïa ka jingïakynad hapdeng kine ki ar kynhun.
U la bynrap shuh shuh da kaba ong ba ym don ki briew ki ban mynsaw jur ha kaba ïadei bad kane ka jingïakynad. Ki kynrum kynram ki la mih hapoh ka seng Congress ha Rajasthan ha kaba u Sachin Pilot u la pynpaw ka jingpyrshah jur ïa u Ashok Gehlot halor ka jingkynnoh ba ka la don ka jingbam sap jong ka sorkar kaba hashwa jong ka seng BJP ha ka jylla bad u la dawa ba la dei ban leh ei ei halor kane pyrshah ïa kiba la donkti.
