Thiruvananthapuram:
Ka jingthombor pyrshah ïa ki nongai jingsumar ka long ka bym lah ban pdiang ha ka imlang ka sahlang bad kito kiba buh jingma ïa ka jingim jong ki ki la dei ban shah ai da kaba tyngeh, la ong u Myntri Rangbah jong ka Kerala u Pinarayi Vijayan ha ka sngi Palei shi sngi hadien ba ka sorkar jong u ka la pdiang ïa ka rai ban wanrah da ka aiñ kum shi bynta ban ai jingïada ïa ki nongtrei ha ki jaka ai jingsumar.
U Myntri Rangbah u la ong ba kan ym don kano kano ka jingïakren ïasuk ne ïasngewthuh jingmut na ka liang jong ka sorkar ha kaba ïadei bad ka mat ban ai jingïada ba kyrpang na ka bynta ki nongtrei ha ka liang ka koit ka khiah.
“Ka jingthombor pyrshah ïa ki nongtrei ka tnat ka koit ka khiah ka long ka bym lah ban pdiang. Ka la rai ba kito kiba buh jingma ïa ki nongtrei jong ka tnat ka koit ka khiah da ki kam thombor jong ki kin sa ngat ha ki jingshah pynshitom kiba tyngeh,” la ong u Vijayan, hadien ba u la dep ban plie ïa ki 5,409 tylli ki Public Health Centres (PHCs) ha Pirappancode Public Health Centre ha Thiruvananthapuram. U la ong ba ka jingshah pynïap jong ka Dr Vandana Das ka la pynlyngngoh ïa kiba bun ha Kerala ha kaba la ong ba kiba kum kine ki jingjia ki la pynthohbria ïa ka jylla hakhmat ki ri ka pyrthei.
Ha ka jingïakren halor kane ka bynta, ka Myntri jong ka tnat ka koit ka khiah ka Veena George ka la ong ba ka jingleh donbor thombor ïa ki nongsumar kam dei ka kam ka ban lah pdiang ha kano kano ka bynta bad dei kane ba balei ka kynhun Myntri jong ka Kerala ka la pdiang ban wanrah da ka aiñ ka ban lah ban pynshitom da kaba tyngeh kum ïa kine ki riewleh donbor.
Ka Dr Das ka la shah pynmynsaw jur haduh ba kan da ïap ha uwei u nongpang ha ka jaka ai jingsumar kaba don ha ka thaiñ Kollam distrik ha ka jingjia kaba la jia ha ka taïew ba la lah.
U briew ïa uba la tip kyrteng kum u G Sandeep, uba dei u nonghikai, u la shah kynnoh ba u la pynïap ïa kane ka doktor bad mynta u dang don ha kti jong ki pulit na ka bynta ka jingshah tohkit.
