Kolkata, Jymmang:
Ka Myntri Rangbah jong ka West Bengal ka Mamata Banerjee ha kine ki khyndiat sngi ba la leit, ka la phah jingthoh sha u Myntri ka tnat Railway u Ashwini Vaishnaw ban buh ka jingkyrpad hakhmat jong u ba un pyntreikam biang da ka jingsiew kumba hashwa ha kaba ïadei bad ka jingsiew ïa ka bai rel ha ki bynta jong ka Azimganj-Katwa ha ka jylla, ha kaba la ong ba ki briew kiba shong basah ha kane ka thaiñ ki dei ki briew ki baduk bad kin ym lah ban siew ïa ki bai tiket ha ka dor kaba rem.
Ka Banerjee ka la ong ba ka la ïohpdiang ïa ka jingkyrpad na ka Eastern Railway Passengers Association, Azimganj-Katwa Section kaba don ha Howrah Division, ha kaba la pyntip sha ka ba la pynkiew ïa ka bai shong rel na ka T. 10 sha ka T. 32 ha ka por ba wan lyngshop ka khlam Covid bad kane ka jingpyntreikam ka dang bteng haduh mynta.
Kane ka jingbuh dor ha kaba ïadei bad ka jingsiew ha ki rel lada leit jingleit ka la buh jingeh khamtam ïa ki briew kiba dei ban mih na ïing ha ka ban leit jingleit manla ka sngi
“Nga kwah ban buh ka jingkyrpad hakhmat jong phi ba phin sangewbha ban phai khmat bad pyrkhat lang bad tip ïa ka jingshisha ba kiba bun ki briew kiba shong ba sah ha Murshidabad distrik bad ki bynta ba marjan ki dei ki briew ki baduk bad kyrduh bha. Ki shem shitom ban thied ïa ka tiket ha ka dor kaba rem, naba bun na ki ki dei ki nongbylla sngi bad kiba shah kynthup hapoh ka BPL bad ki la donkam ban shong da ki rel haba ki mih ban leit bylla na ïing sha ki jaka trei jong ki manla ka sngi.”
Ka Azimganj ka don ha Murshidabad distrik katba ka Katwa ka hap hapoh ka Purba Bardhaman distrik.
Ha kaba ïadei bad ka jingong ba ka Eastern Railway kam shym la patiaw ei ei ha kaba ïadei bad ka jingbuh jingkyrpad jong ka Passengers’ Association, ka Banerjee ha ka shithi kaba ka la phah ka la pynkynmaw ba ha ka por ba don ka dorbar mang tyngka jong u snem 2009-10 ka la mihkhmat kum ka Myntri ka tnat Railway bad ka la pynbna ïa ka ‘Izzat’, ka skhim kaba la wanrah na ka bynta ki briew kiba kham duk bad kham kyrduh, ha kaba la weng bad pynsangeh treikam noh ïa ka kham hadien.
“Nga sngewthuh ba naduh ba ym shym la pyntreikam shuh ïa kane ka skhim, kiba bun ki briew ki baduk bad kyrduh ki la ïakynduh ïa shibun ki jingeh,” la ong ka shithi.
Ka Banerjee ka la long ka Myntri jong ka tnat Railway la ar sien, ha ka sien kaba nyngkong ka la shimti ïa ka kam ha kane ka tnat ha u snem 1999-2000 bad hadien kane ha u snem 2009-2011.
