New Delhi, Jymmang:
Ka India ka la phah ïa ki tiar pyndonkam bad ki jingdonkam baroh ha ki saw tylli ki jhad sha Myanmar na ka bynta ka jingshah ktah ki briew jong ka ha ka jingkhie ‘erïong.
Ka jingpyntreikam na ka bynta ban ai jingïarap sha kane ka ri ba marjan ka long ban ïatreilang ha kaba ïadei bad ka jingïakynduh jingeh jong kine ki briew na ka jingkhie ka ‘erïong ba la tip kum ka ‘Operation Karuna’.
U Myntri ka tnat korbar ri u S Jaishankar u la ong ba kine ki jhad ki la kit ïa ki tiar kiba donkam kyrkieh kum ki jingbam, ki dara, ki dawai kiba kham kongsan, ki kor pom um, ki Portable Generator , ki jaiñ ki nep bad kiba bun kiwei pat.
U heh jong ka tnat shipai duriaw u la ong ba ki jhad jong kane ka ri kiba kynthup ïa ka Shivalik, Kamorta bad Savitri ki la long ki jhad ba nyngkong eh ki ban poi ha Yangon ha ryngkat ki tiar ai jingïarap.
“Ka India ka la kner ki kti kum ka jingsngew paralok sha ki briew jong ka Myanmar kiba la shah ktah jur na ka jingkhie jong ka ‘erïong Mocha. Ka jingpyntreikam ïa ka Operation Karuna ka dang ïai bteng haduh ba la thoh ïa ka khubor. Ki la don kumba lai tylli ki jhad jong ki shipai duriaw ka ri kiba la poi ha Yangon naduh ka sngi Thohdieng. Kaba saw pat ka la poi ha ka sngi Saitjaiñ,” la ong u Jaishankar ha ka jingphah khubor jong u lyngba ka Twitter.
Ka ‘erïong Mocha ka la ktah jur ïa ki bynta rudnong jong ka Myanmar, khamtam ïa ka nongbah Sittwe jong ka Rakhine.
