New Delhi, Jymmang:
U Myntri Rangbahduh u Narendra Modi u la thmu ban plie noh ïa ka Parliament Building kaba thymai ha ka 28 tarik, Jymmang.
U Lamphang jong ka Lok Sabha u Om Birla u la ïakynduh markhmat bad u Myntri Rangbahduh ha ka sngi Palei jong ka taïew ba la lah na ka bynta ka jingthmu ban nang pynbun shuh shuh ïa ki nongshah khot sngewbha ha ka prokram plie ïa ka, kumba la pynshisha da ka Lok Sabha Secretariat.
Katkum ka jingthoh ba la phah da ka Secretariat, la ong ba ka Parliament Building ka ngiam ban pynrung ne buh jaka shong ïa 888 ngut ki dkhot jong ka Lok Sabha Chamber bad 300 ngut ki dkhot ha ka Rajya Sabha Chamber.
Ha ka por ba don ka dorbar jong baroh ar tylli ki ïingdorbar, baroh ki dkhot kin sa don 1,280 ngut ha kaba yn sa pynrung ruh ha ka Lok Sabha Chamber.
Ïa kane ka ïing kaba don saw mala la tei ha ka jinglut kaba la antad kumba T. 970 klur. Kane kan sa ngiam kumba 1,224 ngut ki MP.
Hapoh jong ka la don ka Constitution Hall ha kaba yn sa lah ban pyni ïa ka jingsynshar kaba hiar pateng ha India.
Kane ka ïing ka don ruh ïa ka jaka ban bam bad ka jaka ban pynïeng ïa ki kali.
Ka National Institute of Fashion Technology (NIFT) ka la pynwandur ïa ki Uniform ha ka ban phong da ki nongtrei jong baroh ar tylli ki ïingdorbar.
Kane ka ïing ka don lai tylli ki jingkhang kiba thymmai kiba la tip kum ka Gyan Dwar, Shakti Dwar, bad ka Karma Dwar.
Ka don ruh ha ka ïa ka jaka mih kaba long la kajong na ka bynta ki MPS, ki VIP bad ki nongwan jngohkai.
Ïa u mawnongrim jong kane ka ïing la wan ban plie da u Myntri Rangbahduh ha ka 10 tarik, Nohprah jong u snem 2020.
Ka rukom trei ïa kane ka ïing ka la long kaba paka eh ha kaba ki nongtrei ki la trei shitom ban pyndep kham kloi kumba la buh por ban pyndep tang ha ka por kaba lyngkot, la ong ka jingthoh ba la wan na ka Lok Sabha Secretariat.
Ka ïingdorbar kaba mynta ka dei kaba la shna ha u snem 1927, mynta ka la don kumba 96 snem.
Katba nang mih ki por la ïohi ba ka la donkam da kaba kham heh. Baroh ar tylli ki ïingdorbar kiba kynthup ïa ka Lok Sabha bad ka Rajya Sabha ki la pdiang ïa ka rai ban buh ka jingkyrpad na ka sorkar ba kan shna noh da ka ïingdorbar kaba thymmai, ha kaba la wanrah ïa ka Project ban pyntreikam kumba la thmu.
