Kolkata, Jymmang:
U Myntri ka tnat ki kam pohïing jong ka Karnataka u Araga Jnanendra ha ka por ba la don ka jingïalang jong ki heh sorkar, u la bthah ïa ki heh ba dei khmih ba ki la dei ban pyntreikam pyrkhing bha ha kaba ïadei bad ka jingkhmih bniah ïa ki bar ri kiba sah beaiñ ha ka ri wat hadien ba la kut ka por kumba la buh ha ka Visa. “Ki bar ri kiba sah hapoh ka ri wat hadien ba ki Visa jong ki kim treikam shuh, kin sa shah pynngat ha ki kyndon ba ïadei bad ki kam sniew ba ki long pyrshah ïa ka ri bad la dei ban shim ki sienjam na ka bynta ban pynphai noh ïa ki sha ka ri ba ki wan,” la ong u Myntri ha ka jingïakren bad ki heh sorkar jong kane ka tnat.
U la ai jingmut halor kane ka bynta ha ka jingïalang ba la pynlong kyrpang na ka bynta ban ïamir jingmut halor ka jingnang bun jong ki briew kiba sah ha ki jaka ba la set ïa ki bar ri kiba la sah bad rung beaiñ ha kane ka ri, bad kane ka jingnang don jong ki ka la pynkhapngiah ïa kine ki jaka ksah ha kaba la hap ban pyrkhat ha ka ban pynphai noh ïa ki sha ka ri ba ki wan.
“Ki poi wir na kiwei ki ri, ki kynthup ïa kiba na Bangladesh, ki la dei ban shahkem katkum ki kyndon hynrei ym dei pat ban set ïa ki ha kano kano ka patok bad ïa kine la dei ban bun ha ki ïing ba la buh kyrpang ban set ïa ki. Ha kaba ïadei bad kane, kine ki jaka ba la buh ïa ki ki la treikam tang ha Nelamangala kaba don hajan Bengaluru ha kaba la ong ba ka jaka ka la khapngiah bad khim bha,” la ong u State Director General of Police u Praveen Sood. U Myntri ka tnat ki kam pohïing u la ong, “ka tnat Social Welfare ki la dei ban pynbiang ka jingai jingïarap na ka bynta ban lah ban pynheh shuh shuh ïa ki jaka ban buh ïa ki poiwir.” U Myntri ka tnat ki kam pohïing u la buh ka jingkyrpad na u Myntri ka Social Welfare u Kota Srinivasa Pujari ba la dei ban leh ïa kaba donkam khnang ba kan ym don kano kano ka jingsahteng ha kaba ïadei bad ka jingpyllait ïa ka jingïarap pisa.
