Chandigarh, Jymmang:
U heh nongïalam jong ka seng Rashtriya Loktantrik Party (RLP) bad u MP jong ka Nagaur u Hanuman Beniwal u la pynlong ïa ka jingïalang bad u Myntri Rangbah jong ka Punjab u Bhagwant Mann ha Bhatinda ha ka sngi U Blei.
Ha kane ka jingïalang, kaba la shim por da kumba 2 kynta, u Beniwal u la wanrah ïa ka mat ba ïadei bad ki jingïakhih jong ki nongrep kiba la pynpaw ïa ka jingeh jong ki kaba long na ka jingkyrduh um ha Hanumangarh bad Sriganganagar distrik jong ka Rajasthan, kaba ïasam ïa u pud u sam bad ka Punjab. Ïa u Beniwal la synran lang da ki nongïalam jong ka kynhun ki nongrep jong ka Sriganganagar bad Hanumangarh.
Ki nongrep ha kine ki ar tylli ki distrik ki la pynpaw ba ki la ïakynduh ïa shibun ki jingeh na ka daw ka jingkyrduh um ha kane ka aïom bad ka la pynïakynduh jingeh ïa ki na ka bynta ban pynbiang um sha ki jingthung jingtep.
Hadien kane, u Beniwal u la ïathuh halor ki jingïakren bad ïamir jingmut bad u Myntri Rangbah u CM Bhagwat Mann ha kaba la ong ba hadien ba la dep ban ïakren sani bha halor kine ki jingeh yn sa lah ban pynurlong noh shen ïa ka jingdawa ba la buh da ki nongrep.
“Ha ryngkat ka kynhun nongïalam jong ki nongrep na Hanumangarh bad Sriganganagar distrik jong ka Rajasthan, ka la don ka jingïalang bad ki heh sorkar ha Bhatinda ha ryngkat ka jingdonlang jong u Myntri Rangbah u Bhagwant Maan,” la ong u heh nongïalam jong ka seng RLP.
