Kolkata, Jymmang:
Ym da slem than hadien ka jingjia ba shyrkhei jong ka jingbthei bom ha kawei ka karkhana shna bom pataka kaba la pyntreikam beaiñ ha Egra kaba don ha East Midnapore distrik ha kaba ki la don kumba 11 ngut ki briew kiba la ïap bad bun ngut kiwei pat kiba la mynsaw, ka la don sa kawei pat ka jingjia jong ka jingbthei bom kaba la jia ha Budge Budge kaba don ha South 24 Parganas, ha kaba ki la don kumba lai ngut ki briew na kawei ka longïing kiba la duhnoh ïala ka jingim.
Kane ka jingjia jong ka jingbthei bom ka la jia ha ka miet jong ka sngi U Blei ha ka shnong Chingripota kaba don ha Nandrampur jong ka Budge Budge. Baroh lai ngut ki dkhot jong ka longïing, ha kaba la buh beaiñ ïa ki bom pataka, ki la mynsaw jur ha kaba la pynkit mar mar ïa ki sha Budge Budge ESI hospital, ha kaba la pynbna da ki doktor ba ki la khlad lypa hashwa ban pynpoi ïa ki sha ka jaka ai jingsumar.
Ka kynhun jong ki pulit ka la leit ban jurip bniah ïa katei ka jaka ba la jia ka jingjia ha kaba la ïoh ban kurup ïa ki bom pataka ba la buh beaiñ.
Kum ban shu pynkynmaw la ong ba ha ka taïew ba la lah ki la don kumba 9 ngut ki briew kiba la ïap bad hadien ki la don sa ar ngut kiba la don sa arngut kiba la ïap naba la jur ki jingmynsaw na ka jingbthei ka karkhana shna bom pataka ïa kaba la pyntreikam beaiñ ha Egra ha East Midnapore distrik.
U nongïalam ha kaba ïadei bad ka jingshna beaiñ ïa ki bom ha katei ka karkhana ruh u la ïap naba jur ki jingmynsaw ha Nursing Home kaba don ha Cuttack.
