Gurugram, Jymmang:
Ki pulit jong ka Nuh ki la pynlong ïa ka jingleit khynra ha ki jaka rieh jong ki 12 ngut ki runar ïa kiba la kwah ban kem da ki pulit ha ka por ba dang step phyrngab jong ka sngi Saitjaiñ, la ïathuh ki pulit.
Nalor kane, ki pulit ki la ïathuh ba kane ka jingleit khynra ka la long sha ki ïingsah bad kiwei pat ki jaka ba don ka jingïadei bad kine ki runar, ha kaba ki la bynrap shuh shuh da kaba ong ba kane ka jingthmu jong ka jingpynlong ïa kane ka jingleit khynra ka long ban pynpulom ïa ka jingpyntreikam jong ka kynhun ba la ïatreilang hapdeng ki runar, ki nongkhaïi masi tuh bad ki nongkhaïi drok ïa kiba la treikam na Nuh.
Hadien ka jingleit khynra, ki pulit ki la ïathuh ba kine ki runar ki la phet na ki jaka sah jong ki hashwa ka jingpoi jong ki pulit, hynrei ha kaba ïadei bad kane, ki pulit ki la kurup noh tang ïa ki kot ki sla donkam na ki ïing sah jong kine ki runar.
Kane ka jingleit khynra ka la long khyndiat sngi hadien ba ki pulit ki la lah ban pynpulom ïa ka kam khaïi tuh bad kem ruh ïa ki hynriew ngut ki briew kiba la rah ïa u Heroin ba 390.56 gram ïa uba la ïoh ban kurup.
Kumba la antad la ong ba une u jingdih pynbuaid ïa uba la ïoh ban kurup u shongdor kumba T. 50 lak, la ïathuh ki pulit, ha kaba ki la bynrap shuh shuh da kaba ong ba kine kiba la shah kem ki la donkti ha ka ban khaïi ïa u Heroin sha ki nongdie drok kiba don ha ka distrik naduh ki khyndiat bnai ba la lah.
Ki pulit ki la ïathuh ba napdeng kine ki hynriew ngut kiba la shahkem la kynthup lang ruh uwei u nong Nigeria uba la sah beaiñ ha kane ka ri.
Ki heh pulit ki la ïathuh ba hadien ba la ïoh jingtip halor kane, ka la don ka jinglum bad thaw ïa ka kynhun jong ki pulit ïa kaba la shah pyntreikam ha Nalhar Chowk naduh ka miet jong ka sngi Balang.
Ha ka por ba la pynlong ïa ka jingkhmih bniah ïa ki kali kiba ïaid ha ki surok, ki pulit ki la lap ïa ki pla kiba rit kiba don ïa u Heroin ha kaba la thep ïa ki ha ka kali bad kem noh ïa lai ngut ki briew kiba shong hapoh kane ka kali.
U Varun Singla, uba long u Superintendent of Police, jong ka Nuh u la ong ba kine kiba la shahkem ki la phla ha ka por ba ki l shah tohkit ba u Jan Mark, 24, uba long u nong Nigeria, u la long u nongkhaïi drok. Une u la shahkem na Gurugram.
“Ha kaba ïadei bad ka jingïoh jingtip na u nongkhaïi drok, ki pulit ki la ïoh jingtip ba ka kynhun jong u nong Nigeria ka la treikam na Delhi bad Gurugram,” la ong u Singla.
Ha baroh, ki la don kumba 6 ngut kiba la shahkem ha ka sngi Balang bad ïa kine kiba la shahkem la tip kyrteng kum u Aashiq Khan, 28, Abid, 24, Sachin Garg, 26, Praveen Rab, 24, Mohammad Huzefa, 29, bad u Jan Mark.
Ha ka por ba la pynlong ïa ka jingtohkit, u Hufeza u la phla ba ki la donkti ha ka kam khaïi drok da kumba katto katne por.
“Kine ki nongkhaïi drok ki ju leit ïakynduh ïa ki katto katne ngut ki briew ha Nuh, ïa kiba la pyndonkam ïa ki ha ka ban die ïa u drok sha ki jylla kum ka Uttar Pradesh, Rajasthan bad Haryana,” la ong u Singla, ha kaba u la bynrap shuh shuh da kaba ong ba ïa kine ki jingdih pynbuaid ba la ïoh ban kurup la thmu ban aiti sha palat 20 ngut ki nongdie drok ha ki thaiñ bapher bapher.
U Singla u la ong ba kiwei pat ki briew kiba nabar ri ki la don bynta lang ha ka kam khaïi drok ha NCR, Palwal, Nuh, Rajasthan bad kiwei pat ki distrik jong ka Haryana.
Ha kaba ïadei bad ka jingtohkit kaba hashwa la lap ba u nong Nigeria um lah ban pyni ïa ka Passport jong u ne ïa ka Visa.
Ki pulit ki la ong ba u Surender Sindhu, uba long u nongkhmih bad nongpynïaid jong ka kynhun khaïi drok, u la don ha Nalhar Chowk ha ka por ba ka la don ka jingleit khynra.
U la ïoh jingtip ba lai ngut ki dkhot jong ka kynhun runar jong u kin sa poi ha katei ka jaka na ka bynta ban die ïa ki song jong u drok.
Ka la don ka jingmudui pyrshah ïa kine ki nongkhaïi drok kiba la shah pynngat hapoh ki kyndon jong ka Narcotic Drugs and Psychotropic Substances (NDPS) Act bad la buh jingmudui ruh ïa ki ha ka jaka treikam jong ki pulit ka Tauru ha ka sngi Balang, la ïathuh ki pulit. Ha kaba ïadei bad ka jingjia kaba mynta, u Superintendent of Police, jong ka Nuh u Varun Singla, u la ong ba hadien ba la dep ban thaw ïa ka kynhun pulit, ka la ong ka jingleit khynra hsa palat 300 tylli ki jaka ba don ka jingïadei bad kine ki runar kiba la shah thwet.
