Bengaluru, Jymmang:
Khyndai ngut ki Myntri kiba don ha ka kynhun myntri ka Karnataka 2023 ki la shah pynshisha ba ki la don bun tylli ki mukotduma kiba long pyrshah ïa ki. Kine baroh ki myntri ki dei ki heh spah kiba im da ki klur tyngka, la ïathuh ka kaiphot ba la wanrah da ka Association for Democratic Reforms (ADR) ha ka lah sngi U Blei.
U Symbud Myntri Rangbah u DK Shivakumar u la tam ïa baroh ha ka jingdon spah jong u katba u khun jong u President jong ka seng Congress u Mallikarjun Kharge u Priyank Kharge u la long uba don duna eh ïa ka spah.
U Myntri Rangbah u Siddaramaiah bad ki 9 ngut ki Myntri ki la shah pynbam smai ha ka sngi Saitjaiñ ha Bengaluru. Kiwei pat ki myntri ki kynthup ïa u G Parameshwara, MB Patil, KH Muniyappa, KJ George, Satish Jarkiholi, Ramalinga Reddy bad u BZ Zameer Ahmed Khan.
“Ka jingkheiñ jong baroh ka spah jong ki 9 ngut ki Myntri ka la long T. 229.27 klur. U Myntri ïa uba la shah pynbna ba u la long uba bun spah tam u dei u D K Shivakumar na Kanakapura konstitwensi ha kaba ka spah jong u ka la don T. 1413.80 klur. U Myntri uba don duna eh ka spah u dei u Priyank Kharge na Chittapur (SC) konstitwensi une u don T. 16.83 klur. Baroh kine ki 9 ngut ki Myntri ki la shah pynshisha ba ki la don ïa ka spah kaba katkum ki kyndon aiñ ha kaba u Myntri uba don bun eh ïa kane ka spah u dei u D K Shivakumar da T. 265.06 klur,” la ïathuh ka kaiphot jong ka ADR.
Ha kaba ïadei bad ka jingïathuh bniah halor ki kyrdan pule ba ki Myntri ki don, la ong ba “3 ngut ki Myntri (33%) ki dei kiba la pyndep ïa ka klas 8 bad klas 12, katba 6 ngut (67%) ki Myntri ki dei kiba la pyndep Graduate bad kiwei pat ki kyrdan ba kham shaneng. Shuh shuh la ïathuh ba 5 ngut (56%) ki Myntri ki dei kiba la don ha ka rta kaba 41 bad 60 snem katba 4 ngut (44%) ki Myntri ki la pynshisha ba ki la don ha ka rta kaba 61 bad 80 snem.”
