New Delhi, Jymmang:
Kum shi bynta ban ïai bteng ha kaba ïadei bad kajingthmu ban nang pynkhlaiñ shuh shuh ha kaba ïadei bad ka jingïatylli jong ka liang pyrshah ban ïakhun pyrshah ïa ka seng BJP na ka bynta ka ilekshon Lok Sabha 2024, u Myntri Rangbah jong ka Bihar u Nitish Kumar ha ka lah sngi U Blei u la ïakynduh ïa u heh nongïalam jong ka seng Congress u Mallikarjun Kharge ha Delhi.
Kane ka dei ka sien kaba ar ha kaba la don kum kane ka jingïakynduh kaba la long hapdeng u Kumar bad u Kharge ha ki shi bnai shiteng ba la leit.
Ka tyllong khubor ka la ïathuh ba u Kumar u la ïakynduh ïa u Kharge bad ïa u Gandhi ha ka jaka sah jong u heh nongïalam jong ka seng Congress ka 10, Rajaji Marg.
Kumba la ïathuh ka tyllong khubor la ong ba kane ka jingïalang ka long shi bynta ban nang pynkhlaiñ shuh shuh ïa ka liang pyrshah bad ha kane ka jingïalang la ïakren ruh ha kaba ïadei bad ka jingïakynduh jong baroh ki nongïalam jong ka liang pyrshah ka ban sa long ha Patna.
Ka la bynrap shuh shuh da kaba ong ba u General Secretary (Organisation) jong ka seng Congress u K C Venugopal bad u heh nongïalam jong ka seng JD(U) u Lalan Singh ki la don lang ha ka por ba la don katei ka jingïalang, ha kaba ka la long shi sngi hadien ba u Kumar bad u Myntri Rangbah jong ka Delhi u Arvind Kejriwal ki la wer ïa ki seng ka liang pyrshah ba kin ïatylli kawei bad ban ïakhun pyrshah ban pynkhyllem ïa ka seng BJP.
Ka tyllong khubor ka la ïathuh shuh shuh ba u nongïalam jong ka seng JD(U) u la ïakynduh ïa u nongïalam jong ka seng AAP ha ka jaka sah jong u bad u la ai ka jingkyrshan sha u ha kum kane ka por ba la don ka jingïapher jingmut hapdeng ka sorkar kmie halor ka jingleh donbor jong ka tang ba ka don ha ka bor synshar.
Kumjuh u Myntri Rangbah jong ka Bihar u Nitish Kumar, u Tejashwi Yadav, u Myntri Rangbah jong ka Jharkhand u Hemant Soren, u President jong ka Nationalist Congress Party u Sharad Pawar, u Myntri Rangbah jong ka Tamil Nadu u M K Stalin bad u President jong ka National Conference u Farooq Abdullah ki la don bynta ha ka lympung ba la pynbam smai ïa u Siddaramaiah kum u Myntri Rangbah jong ka Karnataka ha ka sngi Saitjaiñ, ha kaba kane ka la long ka dak jong ka jingïatylli ka liang pyrshah, ka la bynrap.
