Chandigarh, Jymmang:
Ki shipai ka tnat Border Security Force ki la lap biang ha ka sien kaba san ïa ki Drone na Pakistan tang ha ki saw sngi ba la leit. Kane ka Drone kaba mynta kaba la wan rung sha ki bynta jong ka ri na International Border (IB) ha Punjab ka la wan ban pynhap ïa ki jingsong jong u drok, la ïathuh u nongaiktien jong ka tnat shipai hynnin ka sngi.
Katei ka Drone ka la shah siat noh ha ka por 9 baje jong ka miet lah sngi U Blei ha Amritsar Sector ha ka shnong Bhaini Rajputana jong ka Amritsar distrik, u la ong.
Ki shipai BSF ki la lap ïa ka Drone ba la teh lang bad ka jingsong kaba don ïa u Heroin uba 2.1 kilo, la ïathuh u nongaiktien.
Kawei ka Torch kaba rit bad kaba meh la lap lang na kane ka Drone, ka jingpynmeh ïa kane ka jingba ka long ba ki nongkhaïi drok kin lah ban ïohi ïa ka haba ka don ha madan hadien ba la pynhap ha ki bynta khappud jong ka ri, u la ong.
Kane ka dei ka jingjia kaba san ha kaba ka la don ka jingwan rung jong ki Drone sha ki bynta jong ka ri na ki bynta khappud jong ka Punjab naduh ka 19 tarik, Jymmang. Ki la don shuh shuh ki jingsawa ba la ïohsngew ha kine ki saw sngi ba la leit hynrei haba la khmih ym shym lap ei ei, la ïathuh ki shipai.
Ki BSF ki la ïoh ban siat ïa ar tylli ki Drone bad ki la lap ïa kawei pat kaba lai ha ka sngi Thohdieng jong ka taïew ba la lah.
U nongaiktien jong ka tnat shipai, u la ong ba kane ka Drone ka la hap ha ki bynta jong ka ri Pakistan bad ha kaba ïadei bad kane haba la khmih bniah ha ki bynta u pud u sam ym shym lap ei ei.
Sa kawei pat ka Drone kaba la rung sha ki bynta jong kane ka ri la lap ha ka miet jong ka sngi Saitjaiñ ha kaba ka la shah siat ha ki shipai ha ki bynta jong ka Amritsar Sector bad ki shipai ki la lap ïa u drok ba 3.3 kilo na kawei ka jingsong.
