New Delhi, Jymmang:
Ka Supreme Court ha ka Lah Sngi U Blei ka la mynjur ban bishar bniah halor ka jingkyrpad ba la phah da u nongïalam jong ka seng TMC u Abhishek Banerjee halor ka jingshah kylli jingkylli jong u ha ka kynhun CBI ha kaba ïadei bad ka jingdon jong ka kam bamsap kaba la mih na ka jingthung kam nonghikai ha West Bengal.
U Banerjee, ïa uba ha ka 20 tarik, Jymmang u la shah kylli jingkylli da kumba 9 kynta ha ka kynhun CBI na ka bynta ban tohkit ha kaba ïadei bad ka jingjia, u la pan ka hukum na ka ïingbishar ha kaba u la ong ba kam shym la don kano kano ka jingpyntreikam pyrshah ïa u da ka kynhun tohkit.
Ïa kane ka jingkyrpad la pynsngew da u Senior Advocate Abhishek Manu Singhvi hashwa ba ka kynhun tohkit ba la khlieh da u Justice Aniruddha Bose bad u Justice Sanjay Karol.
Kum ka jingbuh jingkyrpad ha kaba ïadei bad ka hukum naba kam shym don ka pyntreikam ei ei, u heh nongbishar u la ong, “Nga la shah Phone jan man ka sngi katba nga dang don ha Darjeeling. Nga la shah kylli jingkylli naba kam shym la don kano kano ka jingpyntreikam. Nga la leit na ka bynta ka Campaign shabar ka jylla. Nga la sngewkhia ruh halor ka jinglut jong u, ngi la buh ka jingkyrpad ha kaba ïadei bad kane ruh.”
Ka kyrteng jong u Banerjee ka la paw na ka jingbuh jingmudui jong u Kuntal Ghosh, uba long uwei na ki heh spah bad uwei napdeng kiba la shah kynnoh donkti ha ka kam bamsap kaba la mih na ka skul, ha kaba u la pynshisha da kaba ong ba ka kynhun tohkit ka la pynbor ïa u ba un pynmih ïa ka kyrteng jong u Banerjee, uba long u General Secretary jong ka seng TMC, ha kaba ïadei bad ka jingjia.
