New Delhi, Jymmang:
Ka kynhun Enforcement Directorate ha ka sngi Balang ka la pynlong biang ïa ka jingleit khynra hynnin ka sngi, kynthup sha ki jaka sah bad ki jaka treikam jong ki katto katne ngut ki briew kiba don ka jingïadei bad u MP jong ka seng AAP u Sanjay Singh ha Delhi, ha kaba ïadei bad ka jingdon jong ka jingjia klop tyngka na ka jingbym pyntreikam hok ïa ki rukom pyntreikam ha kaba ïadei bad ka kyiad, la ïathuh ki heh jong ka kynhun tohkit.
U nongïalam jong ka seng Aam Aadmi Party (AAP) u la phah ruh da ka jingthoh ha ka Video lyngba ka Twitter, ha kaba la ong ba arngut na ki nongïarap jong u kiba kynthup ïa u Ajit Tyagi bad u Sarvesh Mishra-ki la shah khynra lang ha ka kynhun tohkit. Kumba la ïathuh ka tyllong khubor, la ong ba ki la don kumba 6 tylli ki jaka treikam kiba la shah khynra hapoh ka jingtreikam jong ka Prevention of Money Laundering Act (PMLA). Ïa kane la pyntreikam hadien ba la ïoh jingtip na ka jingpynlong ïa ka jingtohkit ïa ki katto katne ngut kiba la shah kynnoh donkti ha ka jingjia. Ka tyllong khubor ka la ïathuh ba ki la don kumba katto katne ngut ki briew kiba la shah khynra ha kaba ïadei bad ka jingshah kynnoh ba ki la don bynta ban ïatreilang bad u Singh.
U MP jong ka Rajya Sabha u la pynshisha ba u Finance Secretary jong ka sorkar kmie u la buh ka jingkynnoh ïa u Director jong ka kynhun ED bad ïa u Assistant Director bad u Investigating Officer uba tohkit bniah halor ka jingjia ba ki la buh ka jingkynnoh bymhok pyrshah ïa u ha kaba ïadei bad kane ka jingjia. Ka tyllong khubor kaba la wan na ka kynhun ED ka la ong ba ka kynhun ka la buh ka jingkyrpad ha ka 20 tarik, Ïaïong, ha ka ïingbishar ha kaba la dawa ba la dei ban pynbeit ïa ki jingthoh kiba bakla ha kaba ïadei bad ka jingbuh ïa ka kyrteng jong u Sanjay Singh ha ka jingbuh jingmudui jong ka. Ka tyllong khubor kaba la wan na ka kynhun tohkit, ka la ong ba ka kyrteng jong u Singh ka la paw ha ka jingbuh jingmudui da saw sien ha kaba la ong ba ka jingbakla ka la long tang shisien naba la buh kyrteng ïa u kum u Rahul Singh.
