New Delhi, Jymmang:
U nongïalam jong ka seng Congress u Rahul Gandhi ha ka miet jong ka Lah Sngi U Blei u la shong da ka trok na Murthal kaba don ha Haryana sha Ambala, ha ka por ba u dang leit na Delhi sha Chandigarh.
U Gandhi, uba la leit ban ïakynduh ïa ki briew lyngba ka jingïaid lynti jong u ha kaba u la ïakren bad ki nongñiah trok khnang ba un lah ban sngewthuh ïa ki mat bad ki jingeh ba ki ïakynduh. U Rahul u la poi ha Murthal kaba don ha Haryana ha ka por 11 baje mynmiet.
Na Murthal, u la shong sa ka trok ha ka por 12 baje shiteng miet bad u la poi ha Ambala.
Ha ka jingïaid lynti jong u na Murthal sha Ambala, u nongïalam jong ka seng Congress u la ïakren bad ki nongñiah trok shaphang ki mat bad ki jingeh ba ki ïakynduh, la ïathuh ka tyllong khubor.
U la ïakren ruh bad ki halor kiba bun kiwei pat ki mat kiba la kham buh jingeh ïa ki.
Hadien ba u la poi ha Ambala, u Rahul Gandhi u la leit sa sha Shimla kaba don ha Himachal Pradesh lyngba ka surok. Ha kaba ïadei bad kane, ka kynhun nongïalam jong ka seng kam shym la ong ei ei ha kaba ïadei bad ka jingleit jingleit jong u Rahul.
Ha ka jingphah jingthoh lyngba ka Twitter, u MP jong ka seng Congress ha Rajya Sabha bad u heh nongïalam jong ka kynhun ki ritpaid u Imran Pratapgarhi u la thoh, “Ka jinglah ban ïakynduh ïa ki noongñiah trok bad ban tip kham bniah shaphang ki jingeh ba ki ïakynduh bad ka jingïakren bad ki ha ka por ba ki ñiah trok ha ka surok bah, ka la long kaei kaei kaba phyla ha kaba la sakhi ba la lah ban leh ïa kane tang u Rahul hi. Phi la leh ïa kaei kaei kaba phyla.”
