Amaravati, Jymmang:
U President jong ka seng YSRC bad u Myntri Rangbah jong ka Andhra Pradesh u Y S Jagan Mohan Reddy ha ka sngi Ba-ar u la ong ba ka seng jong u kan sa trei shitom na ka bynta ban pyntikna ha ka ban wan rah ïa ka jingjop ha baroh ki 175 tylli ki konstitwensi ha ka jingïakhun ïa ka ilekshon Assembly ka ban sa long ha u snem 2024.
U Reddy u la pynpaw ka jingsngewnguh ïa ki paidbah jong ka jylla halor ka jingkitbok bad ka jingai mynsiem jong ki ha ka jingrakhe ïa ka jingdap saw snem ka sorkar jong u kaba la wan ha ka bor synshar.
“Shi bynta ban ñiew ba kane ka long ka lad ban ai ka jingshakri na ka bynta jong phi, ngi la pyntreikam ïa baroh ki jingkular ba ngi la khlei ha ka por ba don ka ilekshon ha u snem 2019 ha kaba la pynurlong kawei hadien kawei pat hapoh ka jingkhmih ka sorkar jong ngi. Ngi la shim ka sienjam na ka bynta ban ïoh ïa ka jingjop ha ki 175 tylli na ki 175 tylli ki konstitwensi ha ka ilekshon ka ban sa wan khnang ban ïohlad biang ban ai ka jingshakri na ka bynta jong phi sa shisien pat,” la ong u Reddy ha ka jingphah jingthoh lyngba ka Twitter.
U Sajjala Ramakrishna Reddy, uba long u nongai buit- ai bor ha ka liang ki kam saiñ pyrthei jong ka sorkar AP u la pynkynmaw da kaba ong ba ka seng YSRC ka la wan ha ka bor synshar ha kaba ka la jop don burom ha ka jylla, tang phra snem hadien ba ka la paw pyrthei ha u snem 2011.
U la ong ba u Jagan Mohan Reddy u la lah ban pynurlong da kumba 98 percent ki jingkular ba la khlei ha ka por ba don ka ilekshon jong u snem 2019.
