New Delhi, Jymmang:
Ka seng TMC, ka CPI bad ka AAP ha ka sngi Ba-ar ki la pynbna ba kin ym leit ban ïashim bynta ha ka prokram ban plie ïa ka Parliament kaba thymmai ha ka 28 tarik, Jymmang bad kiba bun kiwei pat ki seng kiba kynthup ïa ka seng Congress kin sa ïasnohktilang bad ki.
Ha ka por ba ka la don ka jingdawa jong ka liang pyrshah ba ka President ka la dei ban plie ïa katei ka ïing dorbar kaba thymmai, ki nongïalam jong ki seng ka liang pyrshah ki la khmih bniah bha ha kaba ïadei bad kane ka mat bad ki la ai da kawei ka rai ba kin ym don bynta ha kane ka sngi plie ïa ka, la ïathuh ka tyllong khubor.
Kum shi bynta ban pynbna paidbah halor ka rai jong ka seng, u nongïalam jong ka seng TMC ha Rajya Sabha u Derek O’Brien ha ka jingthoh kaba u la buh ha ka Twitter u la ong, “Ka Parliament kam shym dei tang ka ïing kaba thymmai, ka dei kaba la wanrah ha ryngkat ki jinglong tynrai, ki dor, ki nuksa bad ki kyndon, ka dei ka nongrim jong ka synshar paidbah ki nong India. U Myntri Rangbahduh um sngewthuh ïa kata. Na ka bynta jong u, ka jingleit plie ïa kane ka ïingdorbar kaba thymmai ka long beit baroh shaphang jong nga, ïa nga bad da nga. Ha kaba um kynthup lang ïano ïano ruh.”
U General Secretary jong ka seng CPI u D Raja u la ong ba ka seng jong u kan ym leit ban ïashim bynta ha katei ka prokram.
U MP jong ka seng Aam Aadmi Party u Sanjay Singh ha ka jingphah jingthoh lyngba ka Twitter u la ong, ”Ka jingbym khot ïa ka President Droupadi Murmu sha katei ka jingleit plie ïa ka ïingdorbar kaba thymmai ka long ka jingibeiñ pyrshah ïa ka. Kane ka dei ka jingibeiñ ïa ki riewlum. Ka seng Aam Aadmi Party ruh ka la dep ban pynbna ba kan ym leit ban ïadon bynta ha katei ka prokram plie ïa ka ïingdorbar kum shi bynta ban pyrshah jur ïa u Modi ba um khot ïa ka President ba kan don bynta lang.”
