Amaravati, Jymmang:
Naba la sakhi halor ka jingjur ki kam khaïi dork ha ka jylla Andhra Pradesh, u Myntri Rangbah jong ka jylla u YS Jagan Mohan Reddy u la bthah ïa ki kynhun ba dei khmih ba ki la dei ban ïaid shakhmat na ka bynta ban pynkhlaiñ ïa ki jingpyntreikam bad ban buddien halor ka jingthmu ban khanglad ïa ki jingsniew kiba la mih na u drok.
Hashwa kane, hadien ba la ïohi ïa ka jingkynrei jong ki kam sniew kiba mih na u drok khamtam hadien ka jingïoh kurup ïa ki drok ba bun na ka por sha ka por, u Myntri Rangbah u la hukum ïa ki heh ba dei khmih ba ki dei ban pyntreikam pyrkhing ha ki jaka pule na ka bynta ban pyllait ïa ki na ka jingpyndonkam ïa ki jingdih pynbuaid khamtam na u drok.
Ki heh sorkar ki la hap ban pynbiang ïa ki kaiphot kumba la bthah hashwa naduh ba la sdang ka jingpyntreikam khnang ban lah ban buddien bad wad ki lad ki lynti kumno ban leh ha ka ban ratdyngkhong ïa kine ki jingsniew kiba la rung hapoh ka jylla bad kiba la ktah ruh ïa kiba bun kiba la shah pyngngop ha kine ki jingsniew kiba mih na u drok bad kiwei pat ki jingdih pynbuaid.
Kumba la ïakren la ong ba ka lad ban khanglad bad tehlakam ïa ki jingsniew ba mih na u drok ka long sa tang ban pynjur ïa ki jingpyrkhing bad ban pynshitom da kaba tyngeh lada lap ïa kino kino ki briew kiba kamai spah da kaba pynkharoi ïa kine ki kam sniew kiba ktah ïa ka imlang ka sahlang khamtam ïa kito kiba dang dei ban khie dang san bad kumjuh ki khynnah pule.
