Bhubaneswar, Jymmang:
Ki bor bahalor kum shi bynta ban pyntikna ha ka ban pynbiang ïa ki jngbam ba la dei ban sam sha ki khynnah, ka la bteng ha ka ban ïai buddien halor ki rukom pyntreikam jong ki nongpynïaid bad ki nongkhmih halor kane.
Na ka jingud jong ki nongpynïaid skul bad ki khynnah ïa ka jingbym biang jong ka jingsam jingbam na ka bynta ki khynnah skul, ki bor bahalor ki la buddien khnang ban tip ïa ka daw tynrai halor kane.Kum shi bynta ban pynkhlaiñ ïa ka nongrim ha kaba ïadei bad ka jingpynshisha halor ka jingkynnoh ba ki la don ki jingbym pyntreikam hok hapoh ka Mid-Day Meal Scheme ïa kaba mynta la tip kum ka Pradhan Mantri Poshan Shakti Nirman (PM-Poshan), ka seng BJP ka la buh ïa ka hukum ba la dei ban tohkit halor kane da ka State Crime Branch.
Kum ka jingñiew kyrteng ïa kane ka kam bamsap kaba la mih na ka Mid-Day Meal (MDM) ha Jeypore Block jong ka Koraput distrik, u Chief Whip jong ka seng BJP hapoh ïingdorbar jong ka Odisha u Mohan Majhi ha ka jingïakren bad ki nongthoh khubor, u la ong ba ïa ka prokram ha kaba ïadei bad ka jingpynbiang ïa ki jingbam khlaiñ na ka bynta ki khynnah la pyntroiñ noh da ka sorkar BJD da kaba ai mynsiem halor ka kam bamsap.
“Ki jingtip ba bniah ha kaba ïadei bad ka jingdon jong ka kam bamsap kaba jur ha kaba ïadei bad ka jingpyntreikam ïa ka PM-Poshan ka la poi ha ki shkor jong ka seng na Nuapada, Balangir bad na kiwei pat ki distrik jong ka bynta ba shaphang Sepngi jong ka Odisha. La ïoh jingtip ba u khaw uba ha ka borni kaba 50 kilo u ju duna da 4-5 kilo haman ka borni bad ïa kane la ïoh jingtip ba ka la jia ha kiba bun ki skul. Ha kaba ïadei bad kane, la donkam na ka bynta ban pynlong ïa ka jingtohkit da ki kynhun ka sorkar,” la ong u Majhi.
Kum ka jingpynrem jur ïa ka sorkar jylla ha kaba ïadei bad ka jingpynkynriah jaka trei ïa ki arngut ki Cluster Resource Centre Coordinator (CRCC), ïa ki nonghikai bad ki Data Entry Officer hadien ba la ïoh jingtip halor ka jingdon jong ka jingpynsepei ïa u khaw ha ki katto katne tylli ki skul jong ka Jeypore Block, u Majhi u la ong ba kam shym la don kano kano ka jingpyntreikam ha kaba la dei ban leh pyrshah ïa ki kynhun ki riewshimet kiba la phah ïa u khaw bad ïa ki heh nongpynïaid kiba la dei ban khmih bniah halor kane ka bynta.
Kum ka jingkynnoh ba ka kam bamsap hapoh ka PM-Poshan Sheme ka la suhthied bha bad da ki klur tyngka ka pisa la pyndonkam bakla da ki kynhun kiba dei khmih halor kane ka bynta ha ryngkat ki heh nongïalam jong ki kam saiñ pyrthei, u Majhi u la ong ba ka sorkar ka la khapbrip ïa ki khmat naba kane ka skhim ka la ai jingmyntoi ïa kiba bun ki briew kiba dei ki dkhot jong ka seng kaba bat ïa ka jingsynshar. Baroh ki jingthmu jong ki seng ka liang pyrshah ha kaba ïadei bad ka jingkyntu ban don da ka jingïatyrko nia bad ïamir jingmut ha kaba ïadei bad kane ka bynta, ha ïingdorbar la pynshisha ba u Lamphang um ju ailad.
Kane ka la paw shai ba ka sorkar ka la sheptieng ba na kane ka jingïakren yn sa paw shibun ki kam sniew ba la leh ki ban long na ki tnat Civil Supplies bad ki School Education, u la bynrap. Ka PM-Poshan ka dei ka skhim ba la kyrshan da ka sorkar kmie na ka bynta ban pynbiang ka jingbam kaba la shet bha bad kaba khluit ban ai sha ki khynnah kiba leit ha ki skul sorkar bad ki skul ba hap hapoh ka jingkhmih jong ka sorkar kaba la treikam naduh u snem 2021-22 bad ka ban bteng haduh u 2025-26.
