New Delhi, Jymmang:
Khyndiat sngi hadien ka jingpynbna jong ka Reserve Bank ban ym pyndonkam shuh ïa ki lut T. 2,000, u MP jong ka seng Congress ha Rajya Sabha u Digvijaya Singh u la kynthoh jur ïa ka sorkar kmie ha kaba u la ong ba ka sorkar ka la dei ban batai shai halor ka jingpynmih ïa ki lut T. 2,000.
Ka Reserve Bank of India (RBI) ha ka sngi Thohdieng jong ka taïew ba la lah ka la pynlyngngoh ïa kiba bun naba ka la pynbna ban ym pyndonkam shuh ïa ki lut T. 2,000, hynrei ka la ai por ïa ki paidbah haduh ka 30 tarik, Nailur ba kin thep ne ban kin kyliang noh ïa ki ha ki Bank.
Ka RBI ka la ong ba ka la bthah ïa ki Bank ba kin pynsangeh noh ha ka ban pynmih ne pyndonkam ïa ki lut T. 2,000 naduh ka sngi ba la pynbna ban pynsangeh pyndonkam ïa ka.
Haba la buh jingkylli ha kaba ïadei bad ka rai jong ka RBI, u Singh ha ka sngi Ba-ar u la ong ha ki nongthoh khubor ha Indore kumne, “Ha kaba nyngkong ka sorkar kmie ka la dei ban batai shai balei la pynmih ïa kane ka lut tyngka.”
