Bengaluru, Jymmang:
U Myntri Rangbah jong ka Karnataka u Siddaramaiah u la ong ba ki la don kumba 52 ngut ki briew kiba la ïap haduh mynta na ka daw ka jingwan hap jong u slap bajur ha ka jylla, ha ryngkat ka jingjulor bun ki jingdon jingem, bad u la hukum ïa ki heh ba dei khmih ba kin pynbiang kham kloi katba lah ïa ki jingai jingïarap.
U la ong ba ki heh ba dei khmih ki la shah hukum ba kin sa shah pynshitom da kaba tyngeh lada jia ba kim lah ban pyndep ïa ka kamram ba ki dei ban leh.
“Kumba la sakhi, la ong ba ka jinghap jong u slap ka la long naduh u Ïaïong haduh u Jylliew, kane ka la long ha kiba bun ki bynta jong ka jylla. Ha kane ka por ba mynta ka jingwan hap jong slap ka la kham kloi haba ïanujor bad kiwei pat ki snem. Ki la don kumba 52 ngut ki briew kiba la duh noh ïa ka jingim haduh mynta, bad kumba 331 tylli ki jingri ki la ïap na kiba bun ki jingjia na ka daw ka jingwan hap jong u slap, kumba la ïoh jingtip, la ong ba ka jingjulor jong ki jingthung jingtep ka la long ha ki 20,000 Hectare, bad ki la don kumba 814 tylli ki ïing kiba la julor,” la ong u Siddaramaiah ha ka jingïakren bad ki nongthoh khubor.
Ki jingai jingïarap kiba kyrkieh halor kane la dei ban pynbiang bad ban pynkloi katba lah, u la ong.
“Hashwa ïa ka pisa kaba T. 5 lak la dep ban ai sha ki longïing jong ki 52 ngut kiba la ïap, na kiba bun ki jingjia kiba la mih na ka jingjur slap, kum na ka jingkyllem jong ki dieng, ka jingshah pom pyrthat, ka jingshah rong ha ka um bad kiwei pat.”
“Shuh shuh la bthah ba la dei ban ai jingïarap sha kito kiba la duh noh ïa ki jingri na kiba bun ki jingjia, bad kumjuh ruh na ka bynta kito kiba la duh noh ne shah pynjulor ki ïing bad la ong ba la dei ban pynkloi noh ha ka ban ai jingïarap bad jingkyrshan na ka bynta jong ki,” u la bynrap.
