Chennai, Jymmang:
U Myntri Rangbah jong ka Tamil Nadu u M K Stalin ha ka jingleit jngoh jong u sha Singapore u la dep ban ïasoi ïa hynriew tylli ki Memoranda of Understanding (MoU) ha ka sngi Balang bad la pynlong ruh ïa ka jingïakren bad ki heh spah bad ki trai jong ki karkhana.
U Stalin u la mih na Chennai ha ka sngi Ba-ar bad u la leit jngoh sha ar tylli ki ri sha Singapore bad Japan kum shi bynta ban pynïoh ïa ka jingbei tyngka na ka bynta ka Tamil Nadu bad u la kyrpad ruh ïa ki nongbei tyngka ba kin wan sha Chennai ha ka jingïakynduh ka ban sa long ha u Kyllalyngkot jong u snem 2024.
Ïa ki MoU la ïasoi ha ka por ba don ka ‘Investors’ First Port of Call’ ha Singapore kynthup ha ka jingtyrwa na ka bynta ka jingbei tyngka kaba T. 312 klur da ka kompeni Hi-P International Pvt Ltd kaba ha Singapor na ka bynta ban pynmih ïa ki tiar ilektrik ha Tamil Nadu ha kaba da kane yn sa lah ban pynmih ïa kumba 700 tylli ki kam.
U Stalin bad u Myntri uba dei khmih ïa ki karkhana u TRB Rajaa ki la ïakren sani bha ha kaba ïadei bad ki jingbei tyngka ha Tamil Nadu.
Hashwa u Stalin u la ïakren bad u Dilhan Pillay Sandrasegara, uba long u Executive Director bad u CEO jong ka Temasek, u Kim Yin Wong jong ka Sembcorp, bad u Sanjeev Dasgupta jong ka CapitaLand.
Ki la pyntikna ha kaba ïadei bad ka jingïatreilang hapdeng ka Tamil Nadu bad ka Singapore, la ong u Stalin ha ka jingthoh ba u la phah.
