New Delhi, Jymmang:
U Myntri Rangbah jong ka Karnataka u Siddaramaiah ha ka sngi Palei u la ïakynduh ïa ka General Secretary jong ka seng Congress ka Priyanka Gandhi Vadra ha ka nongbah New Delhi.
Ïa u Myntri Rangbah la synran da u Myntri ka jylla Karnataka u BZ Zameer Ahmed Khan, bad u MLA u Byrathi Suresh.
Hashwa kane, kata ha ka 24 tarik, Jymmang u Siddaramaiah u la poi ha Delhi na ka bynta ban ïakren halor ka mat ba ïadei bad ka jingpynïar ïa ka kynhun Cabinet bad ka kynhun nongïalam jong ka seng.
Haba la kylli ha kaba ïadei bad ka jingïakren halor ka jingpynïar ïa ka kynhun Myntri, u Symbud Myntri Rangbah bad u heh nongïalam jong ka KPCC u DK Shivakumar u la ïathuh ha ki nongthoh khubor ba yn sa pyntip ïa kane da u Myntri Rangbah bad ka AICC.
Ha ka jingïakren bad ki nongthoh khubor, u DK Shivakumar u la ong, “Yn sa pyntip halor kane da u Myntri Rangbah u Siddaramaiah bad ka AICC. Kum u President jong ka seng, ngan sa leit sha Delhi.”
Ha ka 18 tarik, Jymmang, u Myntri Rangbah u Siddaramaiah u la shahjied ba un long u nongïalam jong ka CLP ha Karnataka, hadien ba ka seng Congress ka la ai ïa ka rai kaba khatduh halor ka jingjied kyrtong ban ïakhun ïa ka shuki Myntri Rangbah khyndiat sngi hadien ba ka seng ka la ïoh rah ïa ka jingjop ha ka jingïakhun ïa ka ilekshon ha Karnataka.
U Siddaramaiah u la bam smai kum u Myntri Rangbah ha ka 20 tarik, Jymmang bad u DK Shivakumar u la bam smai kum u Symbud Myntri jong u.
Ka seng Congress ka la jop ha ki 135 tylli ki konstitwensi ha jingïakhun ïa ka ilekshon ha ka 10 tarik, Jymmang na ka bynta ban jied ïa ki 224 ngut ki dkhot jong ka Karnataka Assembly ha kaba ka la lah ban pynduh noh ïa ka jingsynshar jong ka seng BJP, ha kaba ka la jop tang ha ki 66 tylli ki konstitwensi.
