New Delhi, Jymmang:
Ha ka jingïatreilang ki pulit ka Delhi bad ki katto katne ngut ki nongtrei mon sngewbha, la ïoh ban pyllait ïa 41 ngut ki khynnah ba la shah pyntreikam ha ka rta ba dang rit jong ki na kawei ka karkhana shna jinglehkai kaba don ha Azad Market ha Delhi. Ïa kane ka jingpyntreikam la pynlong da u Arvind Rana, uba long u SDM Kotwali Darya Ganj, Labour department, u Bal Vikas Dhara, uba la ïoh pdiang ïa ka khusnam Bachpan Bachao Andolan (BBA) jong u Kailash Satyarthi bad ka kynhun pulit ha ka miet jong ka sngi Ba-ar.
Ha kane ka jingpyntreikam ki la don kumba 12 tylli ki karkhana kiba don ha Ram Bagh Road ha Azad Market kiba la shah khang. Ki la don ki jingujor ejahar pyrshah ïa ki trai jong ki karkhana ha ka jaka treikam jong ki pulit kaba don ha Bara Hindu.
Ki khynnah ki dei kiba dang don ha ka rta kaba 13-17 snem, kine kim shym la phong ei ei ha ki kjat jong ki bad ki sopti ruh ki phong da kiba la jot. Kumba la ïoh jingtip, la ong ba kine ki la hap ban trei naduh ka por 9 baje mynstep haduh ka por shiteng miet man ka sngi.
Kine kim da ïoh bha ïa ka jingbam, kim ju ïohthiah bha ruh bad ki la hap ban thiah baroh ha kajuh ka kamra. Kine ki khynnah kiba la shah pyllait ki dei na ka jylla Bihar, Jharkhand bad West Bengal. Hadien ba la ïoh ban pyllait ïa ki la khmih bniah ha kaba ïadei bad ka koit ka khiah jong ki ïa kaba la leh da u Medical Officer, CDMO, u Nabi Karim. Hadien kane la phah ïa kine ki khynnah sha ka Child Welfare Committee (CWC) ha kaba hadien kane la phah ïa ki sha ki jaka sah ba kyrpang.
U SDM ha ka hukum kaba u la phah u la ong ba kine ki nongpyntrei ki la pynkheiñ ïa ka kyndon jong ka Child & Adolescent Labour Act, JJ Act, Bonded Labour System Abolition Act.
U la hukum ïa ki pulit ba ki la dei ban buh ejahar ïa kine ki briew hapoh ka jingtreikam jong ka Bonded Labour Act, Child Labour Act, JJ Act bad Trafficking Act.
Kane ka dei ka jingïoh pyllait kaba bun ha ka sien kaba ar ïa kum kine ki khynnah da ka kynhun BBA ha ka nongbah hapoh ki 10 sngi.
Ha ka taïew ba la lah, ki la don kumba 14 ngut ki nongtrei kiba la shah pyllait na Naraina kaba don ha Delhi ha ka por ba ka la don ka jingleit khynra ba la pynlong da ka jingïatreilang ka BBA,SDM Delhi Cantonment, Labour Department bad ka kynhun pulit.
