Bengaluru, Jymmang:
Hadien ba la ïoh ïa ka jingjop ha ka jingïakhun ïa ka ilekshon ba dang shen, ka seng Congress ka la don ka jingangnud ba kan sa ïoh ïa ka jingjop ha ka jingïakhun ïa ka ilekshon Lok Sabha 2024 bad ka ilekshon Urban Local Bodies (ULBs).
Ha ka por ba la don ka jingïalang jong ka seng Congress Legislature Party (CLP) ha ka sngi Balang jong ka taïew ba la lah, u Myntri Rangbah u Siddaramaiah bad u Symbud Myntri Rangbah bad u President jong ka seng KPCC u DK Shivakumar u la bthah ïa ki MLA ba kin trei shitom ha ki konstitwensi jong ki ha kaba kin hap ban buh ha ki jingmut jingpyrkhat jong ki ha kaba ïadei bad ka Gene
U Shivakumar u la ong ba ka seng Congress ka la dei ban jop ha ki 20 na ki 28 tylli ki Lok Sabha konstitwensi ha Karnataka bad ki la donkam ban trei ha ka ban poi sha ka thong bad kumjuh na ka bynta ka ilekshon Bruhat Bengaluru Mahanagara Palike.
Ka seng Congress bad ka Janata Dal (Secular) ki la ïatreilang na ka bynta ka ilekshon Lok Sabha 2019 kum ki seng synrop bad ki la shah rem ha kaba ki la jop tang mar kawei ka konstitwensi, katba ka seng BJP ka la jop ha ki 25 tylli ki konsitwensi. Ka sorkar synrop ba la lamkhmat da u HD Kumaraswamy ka la don ha ka bor synshar ha ka por ba la dep ban ïakhun ïa ka ilekshon Lok Sabha kaba la dep. Ha kane ka por kaba mynta, ka seng Congress ka la dap da ka jingkmen kaba khraw ha kaba ïadei bad ka jingïakhun ïa ka ilekson Assembly kaba la dep. Kito kiba la dei ban shah thung kum ki Myntri ka distrik ki la dei ban don ki jaka treikam ha ki distrik bad ki MLA ki la dei ban don ki jaka treikam ha ki konstitwensi jong ki, la ong u Shivakumar ïa ki MLA ka seng. “Ka jaka treikam ka seng ka la long ka Temple bad ngi la dei ban buh hakhmat eh ïa kane,” u la ong, ha kaba u la bthah ïa ki MLA ba ki dei ban klet ïa ki nongbud jong ka seng kiba la trei na ka bynta jong ki ha ka ilekshon.
Hadien ka jingïalang, u Shivakumar u la ïathuh ha ki nongthoh khubor ba ka jingpynbiang ïa ki jingdonkam na ka bynta ka sorkar ban pynurlong ïa ki jingthmu ka long ka bynta kaba la buh hakhmat eh da ka sorkar bad baroh ki MLA ki la dei ban pyntikna ba baroh ki jingpyntreikam jong ka sorkar, kynthup ha kaba ïadei bad ki jingkular la dei ban pynpoi sha ki nongïoh myntoi.
