Ludhiana, Jymmang:
Ka Municipal Corporation ka la pynlong ïa ka jingleit khynra ha baroh saw tylli ki Zone, ha kaba ka la ai ruh da ki Challan sha ki trai dukan bad ki nongdie jingdie harud lynti halor ka jingpyndonkam jong ki ïa ki pla plastik ba la khang ban pyndonkam bad kiwei pat ki tiar plastik.
Ha kaba ïadei bad kane ka jingpyntreikam la don palat 130 kilo ki tiar plastik ba la shah kurup noh.
Ka Municipal corporation (MC) ha ka sngi Palei ka la pynlong ïa ka jingleit khynra ha kiba bun ki thaiñ kiba hap hapoh ki saw tylli ki Zone bad ai ruh kumba 60 tylli ki Challan sha ki trai dukan bad ki nongdie jingdie harud surok halor ka jingpyndonkam jong ki ïa ki pla plastik bad ki tiar ba la khang ban pyndonkam.
Ha kaba ïadei bad ka jingthmu ban khang ha ka ban pyndonkam ïa ki plastik ïa kaba la buh thong ba ka la long naduh ka 1 tarik, Naitung, jong u snem ba la lah, ka sorkar kmie ka la buh da ki Control Room ha ki bynta jong ka ri bad ki jylla kum shi bynta ban lah ban pyntikna halor ka jingmyntoi na kane ka jingpyntreikam, la ong u Myntri uba dei khmih ïa ka Environment, Forests and Climate Change u Bhupender Yadav. Nalor ki Control Room, ïa ki ban sa nang pynbha da ka Central Pollution Control Board, yn sa buh ïa ki kynhun bakyrpang na ka bynta ban khmih bniah ha kaba ïadei bad ka jingshna beaiñ, ka jingpynpoi mar, ka jingbuh ïa ki mar, ka jingpynpoi sha kylleng, ka jingdie bad ka jingpyndonkam ïa 12 jait ki jait tiar plastik ïa kiba la pynbna da ka tnat ba dei khmih ha u snem ba la lah.
Ki jylla bad ki Union Territory ki la buh da ki Check Point na ka bynta ban khang ha kaba ïadei bad ka jingpyntreikam ïa ki tiar plastik, la ïathuh ki heh jong ka kynhun CPCB.
Ka thup kyrteng jong ki tiar plastik kiba la shahkhang ban pyndonkam ki kynthup ïa ki Plastic Stick ba ju teh ïa ki balloon, ki lama plastik, ki jingbat plastik ba ju pynneh ïa ki mit-mit, jong ki Ice-Cream, ki plastik ba ju shna pynitynnad ha ki jingkhawai, ki pliang plastik, ki pela, ki klat, ki proh, ki shamoit ki tari, ki jingdih umsoh, ki jingsong ki jingrah jingbam, ki synduk mit-mit, ki Invitation Card, ki synduk Cigarette kiba la shna da ki plastik bad ki PVC Banner kiba hapoh ka 100 micron.
