Hyderabad, Jymmang:
Kiba bun ki lynti rel kiba don ha Telangana ki dang don mynta hapdeng ki jingpyntreikam ha ka ban maramot khamtam naba la sdang wan ka jinghap jong u slap.
U Arun Kumar Jain uba long u In-charge General Manager jong ka South Central Railway (SCR) u la ai jingmut ïa ki heh ba dei khmih ba ki dei ban long kiba husiar bad kiba long adkar ha kaba ïadei bad ka jingwanrah ïa ki lad jingïada na kino kino ki jingjia kiba lah ban jia ha kano kano ka por na ka jingshlei um kaba la long na ka daw jong ka jingjur slap.
Ki heh ba dei khmih jong ka tnat Railway ki la jurip bad khmih bniah ïa ki jingkieng kiba don ha bun tylli ki jaka.
“Ka jingpyntreikam ka la don lypa na ka bynta ban pynkhreh ha kaba ïadei bad ka jingïakhun pyrshah halor ka jingjur slap. Ka jingai jingshngaiñ ïa ki nongleit jingleit ka dei ka bynta kaba hakhmat eh ba la buh ban pyntreikam. Ïa ki heh sorkar kiba la shah buh na ka bynta ban khmih bniah sha ki bynta ba shabar la pynbiang ruh ïa ki bad ki jingdonkam kiba lah ban ai jingïada ha kaba ïadei bad ka jingtreikam jong ki bad ban khmih bniah ïa ki lynti bad ki jingkieng ïaid rel,” u la ong.
Ïa ki kynhun la buh na ka bynta ban pynïaid shakhmat ïa ki jingpyntreikam. Ïa ki jingbatai bniah la phah sha ki heh ba dei khmih ha kaba ïadei bad ka jingleit khmih bniah, ka jingpyntreikam bad ka jingpynbiang ïa ki lynti ïaid rel bad ban phah ïa ki kaiphot hadien kane ka jingjurip bniah.
Ïa ka jaka shong jong ki nongkhmih bniah ïa ki lynti bad ki jingkieng ïaid rel la buh ha kiba bun ki jaka.
