New Delhi, Jymmang:
U nongïalam jong ka seng BJP u Kavinder Gupta ha ka sngi U Blei u la kynthoh jur ïa ka President jong ka seng PDP ka Mehbooba Mufti halor ka jingai jingkyrshan jong ka ïa u heh nongïalam jong ka seng JKLF u Yasin Malik bad dawa ba la dei ban pynlong ïa ka jingtohkit pyrshah ïa ka Myntri Rangbah barim halor ka jingshah pynshisha jong ka ba ka la donkti bad ki riewpyrshah ri.
“Ka jingkren jong u Gupta, uba long u Symbud Myntri Rangbah barim, ka la long hadien ba ka Mehbooba ka la dawa ba la dei ban khmih bniah halor ka mukotduma kaba long pyrshah ïa u heh nongïalam jong ka seng Jammu and Kashmir Liberation Front (JKLF) hadien ba ka kynhun National Investigation Agency (NIA) ka la leit sha ka ïingbishar na ka bynta ban pynjur ka jingdawa ba la dei ban ai da ka rai ban pynïap ha ki kti jong ka aiñ na ka bynta u nongïalam uba dei u lehnoh ha kaba mynta u dang shah set patok ha Tihar Jail.
“Ïa ka mukotduma kaba long pyrshah ïa u heh jong ka seng Jammu and Kashmir Liberation Front (JKLF) u Yasin Malik la dei ban khmih bniah biang bad ba la dei ban shimkhia naba ha ka synshar paidbah kum ha India wat ki nongpynïap ïa u Myntri Rangbahduh ruh ki dang shah map,” la ong ka President jong ka seng PDP hadien ba ka kynhun NIA ka la leit sha ïingbishar na ka bynta ban dawa phah pynïap ïa u Malik ha kti jong ka aiñ.
Kum shi bynta ban kynthoh jur ïa ka Mehbooba halor kane ka jingkyrpad, u nongïalam jong ka seng BJP u la ong ba ka kynhun NIA ka la leit sha Delhi High Court naba ki nongleh bymman kiba la shah rai pynrem halor ka jingjia da kaba kin shah set shi rta jingim kim dei ban shah map.” “… ka dak ba paw shabar jong ka Mehbooba kumba ka la pynpaw ka long ba ka ai jingkyrshan ïa uwei na ki lehnoh ba shyrkhei ha J&K ha kaba kane ka la pynpaw ïa ka jingshisha ba ka lah ban donktilang hapdeng kine ar,” la ong u Gupta ha kaba u la dawa ruh ba la dei ban pynlong ïa ka jingtohkit ha kaba ïadei bad kane, bad ban pynshitom da kaba tyngeh lada lap ïa ki jingbakla jong ka Mehbooba.
U la pynshisha da kaba ong ba ka Mehbooba bad ki nongïarap jong ka ki la lamkhmat ïa ka Jammu & Kashmir naba ki la thmu ban buh hatmier ïa ka ri haba u Myntri Rangbahduh u Narendra Modi u la shimti ïa ka jingsynshar ha ka jylla bad pyntikna ha ka ban wanrah ïa ka jingskhem, ka jingsuk bad ka jingpyntreikam ha ka ban sloit noh ïa ka Article 370 bad ban ïarap ïa ki shipai ki bym shym ïoh jingïarap ei ei.
