Bengaluru, Jymmang:
Ka Y S Sharmila, kaba dei ka para jong u Myntri Rangbah jong ka Andhra Pradesh u Y S Jagan Reddy bad ka President jong ka seng YSR Telangana Party , ka la shah khot ha u President jong ka seng Congress ha Karnataka bad u Symbud Myntri Rangbah u D K Shivakumar ha ka jaka sah jong u kaba don ha Bengaluru hynnin ka sngi. Katkum ka jingïathuh jong ka jaka treikam jong u Shivakumar, la ong ba ka la long tang ka jingïakynduh kum shi paralok hapdeng kine ki arngut ki nongïalam ha kaba kam shym la don ka jingïakren ha kaba ïadei bad kano kano ka mat.
U Shivakumar u la long u paralok jong ka ïing ka sem jong ka Sharmila Reddy naduh ki sngi ba dang im u Myntri Rangbah ba la khlad noh jong ka Andhra Pradesh u YSR Rajasekhara Reddy.
Kumba la ïathuh ka tyllong khubor, la ong ba ka Sharmila Reddy ka la pynpaw ba ka don ka mon ban ïatreilang bad ka seng Congress ha ka jylla Telangana bad ka la ïakren bad u Shivakumar ha kaba ïadei bad kane ka bynta.
Ka seng Congress ruh ka la phai khmat na ka bynta ban pynïatylli ïa ki vote kiba long pyrshah ïa ka seng hashwa ban pynlong ïa ka ilekshon Assembly ka ban long kham hadien jong une u snem.
