New Delhi, Jymmang:
Ka Delhi High Court hynnin ka sngi ka la kyntait ban ai jamin ïa u Symbud Myntri Rangbah barim u Manish Sisodia ha kaba ïadei bad ka mukotduma kaba long pyrshah ïa u halor ka kam bamsap kaba la mih na ki jingpyndkoh treikam ha ka tnat Excise ïa kaba la tohkit da ka kynhun CBI.
U Justice Dinesh Kumar Sharma u la kyntait ban pyllait jamin ïa u nongïalam jong ka seng AAP uba la shahkem ha ka 26 tarik, Rymphang, ha kaba la ong ba ka jingkynnoh kaba long pyrshah ïa u ka dei kaba la hap ban khmih bniah.
Ka High Court, ha ka por ba ka la pynbna ïa ka rai halor ka jingkyrpad jamin, ka la ong ba u Sisodia naba u long u briew uba donbor un sa lah ban pynibor pyrshah ïa ki nongsakhi halor ka jingjia lada jia ba u shah pyllait jamin.
Ka kynhun CBI ka la kem ïa u Sisodia halor ka jingshah kynnoh bamsap ha kaba ïadei bad ka jingthaw bad ka jingpyntreikam ïa ka Delhi Excise Policy 2021-22 ïa kaba mynta la weng bad sangeh pyntreikam noh hadien ba la don bun ki jingmih jingkylli halor jong ka.
U la pynibor pyrshah halor ka rai kaba la long ha ka 31 tarik, Lber ba la ai da ka ïingbishar ha kaba ka la pynbna ba la kyntait ban ai jamin ïa u Sisodia ha kaba ïadei bad kane ka bynta, ha kaba u la ong ba ha ka por ba la pynlong ïa ka jingtohkit la lap ba u la long u nonglam khmat halor kane ka kam bamsap bad u la long u nongïalam ba hakhmat eh halor ka jingïasuhbuit sniew na ka bynta ka jingsiew ïa ka boina kaba long da T. 90-100 klur kaba la mang na ka bynta jong u bad ki para dkhot jong ka sorkar Delhi.
U la shah set patok ruh ha kaba ïadei bad ka jingshah kynnoh klop tyngka.
