Ranchi, Jymmang:
Ka kynhun shipai ïada ri ka la lap ïa san tylli ki bom Improvised Explosives Devices (IED) kiba khlaiñ bor ïa kiba la buh da ki lehnoh CPI (Maoist) ha West Singhbhum distrik jong ka Jharkhand, la ïathuh ki pulit.
Ïa kine ki bom IED la buh da ki lehnoh CPI(Maoist) halor ka jingthmu ban thombor pyrshah ïa ki shipai ïada ri kiba don bynta ban leit thwet bad ïakhun pyrshah ïa ki Maoist ha ka distrik, ki la ïathuh.
Katba saw tylli ki bom IED kiba kynthup ïa 20 kilo bad 12 kilor la ïoh na ka khlaw kaba don hajan ka shnong Tumbahaka, uwei pat u bom IED uba 5 kilo ïa uba la buh ha ka jaka ba long khlaw la lap hapdeng ka shnong Chota Kuira bad Maradiri, la ong ka jingthoh ba la phah da ki pulit ha ka lah sngi U Blei. Baroh ki bom IED ki la shah pynduhbor noh ha katei ka jaka.
Ki pulit jong ka distrik ha ryngkat ka jingtreilang jong ki pulit ka tnat CRPF, ki shipai ka kynhun Cobra bad ka kynhun Jharkhand Jaguar ki la don bynta ha ka ban leit thwet lehnoh naduh ka 11 tarik, Kyllalyngkot hadien ba ki pulit jong ka distrik ki la ïoh jingtip shaphang ka jingdon jong ki heh nongïalam jong ka kynhun Maoist kiba kynthup ïa u Misir Besra, uba la shah thong da T. 1 klur ha ka khlieh jong u, ha ka thaiñ Kolhan jong ka distrik.
Ki la don kumba 8 ngut ki nongshong shnong kiba kynthup ïa uwei u khynnah uba 10 snem bad arngut ki briew kiba la kham noh ka rta kiba la ïap bad kumba 20 ngut kiwei pat kiba kynthup ïa ki pulit ka tnat CRPF ki la mynsaw na ka jingpynbthei jong ki lehnoh CPI(Maoist) ïa ki bom IED naduh u Kyllalyngkot jong une u snem, la ïathuh shuh shuh ki pulit.
