New Delhi, Jymmang:
Ki nongpynmih ïa ki dawai jyrhoh kin sa phah khmih bniah ïa ki dawai ha ki Laboratory jong ka sorkar naduh ka 1 tarik, Jylliew shwa ba kin ïoh jingbit na ka bynta ban phah ïa ki sha kylleng ki jaka.
Kane ka hukum ka la long hadien kiba bun ki kompeni dawai kiba don ha kylleng ki ri ka pyrthei ki la ud shaphang ki dawai ïa kiba la phah da ki kompeni shna dawai kiba na India.
“Ka jingphah ïa ki dawai jyrhoh sha kylleng ki jaka kan sa long tad haduh ban da dep ban khmih bniah ïa ki jinglong bad ki rukom treikam jong ki ha ki Laboratory bad hadien ba la ai syrnot ban pynshisha ïa ka jingbym don jingktah jong ki, ha kaba ïa kane ka jingpyntreikam yn pynlong naduh ka sngi ban sdang ïa ka jingpyntreikam naduh ka 1 tarik, Jyliew, 2023,” la ong u Directorate General of Foreign Trade (DGFT) ha ka jingthoh kaba ki la phah.
Ki Lab kiba kham paw jong ka sorkar kmie ki kynthup ïa ka Indian Pharmacopoeia Commission, Regional Drug Testing Lab (RDTL – Chandigarh), Central Drugs Lab (CDL – Kolkata), Central Drug Testing Lab (CDTL – Chennai, Hyderabad, Mumbai), RDTL (Guwahati) bad ka NABL (National Accreditation Board for Testing and Calibration Laboratories) kine ki long kiba bit na ka bynta ban khmih bniah ïa ka jinglong jong ki dawai jyrhoh.
Kum shi bynta ban batai bniah halor ki rukom long jong ki dawai ba la pynmih na India ha ka ban lah ban pyntikna ïa ka jingbym ktah jong ki dawai, ka sorkar kmie ka la rai ban khmih bniah hashwa ban phah ïa ki sha kylleng ki jaka.
“Kine ki dawai jyrhoh ki la dei ban shah khmih bniah ha ki Laboratory hashwa ban ïoh jingtip na ka bynta ban phah ïa ki sha kylleng,” la ong u heh ba dei khmih, ha kaba la bynrap shuh shuh da kaba ong ba ki la don ki jingshim ïa ki sienjam ha kaba ïadei bad kane ka jingthmu khnang ban lah ban pyntreikam bha halor kane ka jingkhmih bniah ïa ki dawai.
Ha u bnai Rymphang, ka Global Pharma Healthcare jong ka Tamil Nadu ka la pynkynmaw halor ki jinglong jong ki dawai pynjaw khmat. Hashwa kata, ki dawai jyrhoh ba la pynmih ha India ki la shim ïa ka jingim jong ki 66 ngut ki briew bad 18 ngut ki khynnah ha Gambia bad Uzbekistan, ha u snem ba la lah.
Ka India ka la phah ïa ki dawai jyrhoh shabar ri ïa kiba la kot sha ka $17.6 billion ha u snem 2022-23 kaba long pyrshah ïa ka $17 billion ha u snem 2021-22.
