New Delhi, Jymmang:
U Myntri Rangbah jong ka Delhi u Arvind Kejriwal ha ka sngi Ba-ar u la pynbna ïa ka jingïarap pisa kaba T. 10 lak na ka bynta ki bahaïing jong ka khynnah 16 snem ka rta kaba la shah dung ïap ha u samla lade ha ka thaiñ Shahbad Dairy kaba ha Delhi.
U Kejriwal u la ïathuh ha ki nongthoh khubor ba ka Myntri ka Atishi kan sa leit ban jngoh ïa ki bahaïing jong kane ka khynnah, bad ka sorkar ka la pyntikna ba kan sa pynshitom da kaba tyngeh ïa une u runar. Ka sorkar kan sa pynbiang ïa ka bailutksan kaba T. 10 lak sha ki bahaïing jong kane ka khynnah, bad ka la pyntikna ïa ki ba ka sorkar jong ngi kan sa ai da ka jingpynsaja kaba tyngeh ïa une u runar,” la ong u Kejriwal. Ha ka jingkhmih bniah na ka CCTV Footage ha kaba ïadei bad kane ka jingjia kaba la jia ha ka sngi U Blei, u la ong, “Ka long ka bym lah ban pdiang ha kaba ïadei bad kane ka jingshah pynïap jong kane ka khynnah.”
U Myntri Rangbah u la pynpaw ruh ïa ka jingsngewkhia ha kaba ïadei bad ki jinglong jingman hapoh ka nongbah, ha kaba u la buh ka jingkyrpad ïa ka sorkar kmie, kaba la pynïaid ïa ki pulit ka Delhi, ba kin shim ïa ka jingkitkhia ha kaba ïadei bad kane ka jingjia. U la ong, “Ngi la sngewkhia halor ka jinglong jingman ha Delhi. Ngi la kyrpad ïa ki ban ai jingbit ïa ngi ba ngin leh ïa kaba donkam bad ban pynurlong ïa ka jingshimkhia jong ki halor kane ka jingjia kumjuh.
Ngin sa treikam katkum ka Riti synshar kaba la bynshet ha ngi, bad kumjuh la khmih lynti na ka liang jong ki.” Kumba la pynlong ïa ka jingtohkit kaba hashwa, la ïoh jingtip ba kane ka khynnah ka la shah dung da kumba 16 sien bad ka shynrong khlieh jong ka ruh ka la pait hadien ba ka la shah thombor beiñ ha u runar. Kumba ka la paw ha ka CCTV Footage la ïohi ba ka la long ka jingjia kaba shyrkhei bha, ha kaba une u nongpynïap briew u la pyndonkam ruh da u maw heh ban lynthem ïa kane ka khynnah.
Ka long kaba sngewlyngngoh haduh katta katta ba une u runar u la nud ban thombor ïa kane ka khynnah ha ka jaka ba ïohi bad ïaid briew. Kane ka jingjia ka la jia ha thaiñ kaba hap hapoh ka jingkhmih bniah jong ki pulit ka Shahbad Dairy kaba don ha Delhi, bad ïa ka met jong kane ka khynnah kaba sah ha JJ Colony, la lap ba ka la thiah lyngktar ha ka lynti ïaid kjat. Ïa une u runar uba la nud ban leh ïa kane ka kam kaba shyrkhie, la tip kyrteng kum u Sahil, ha kaba u la dung ïa kane ka khynnah haduh ba kan da ïap. Une u runar u la shahkem noh ha ki pulit jong ka Bulandshah kaba don ha Uttar Pradesh ha ka lah sngi U Blei.
Kumba la ïathuh ka tyllong khubor kaba la wan na ki pulit, la ong ba, u Sahil u la Switched Off (pyllip) ïa ka Phone jong u bad u la leit ban rieh hadien ba u la dep ban leh ïa katei ka kam thombor. Ha kaba ïadei bad kane, la ïathuh ba ïa ka jaka kaba u don la lap hadien ba u la Phone ïa u kpa jong u.
