Chennai, Jylliew:
Ka kynhun Enforcement Directorate (ED) ha ka sngi Ba-ar ka la kurup noh ïa ki 78 tylli ki jingdon jingem ki bym shym lah ban pynkhih bad 16 tylli kiba lah ban pynkhih kiba la kot sha ka T. 124 klur ha ka jingpynlong ïa ka jingleit khynra ïa kiba bun ki briew bad ki kynhun kiba la shah kynnoh donkti bad ka kompeni ha Chennai ka Surana Group of Companies hapoh ka jingtreikam jong ka Prevention of Money Laundering Act (PMLA).
Kane ka jingpyntreikam ka la long ha kaba ïadei bad ka jingdonkti ha ki lai tylli ki kam thok kiba la mih na ki bank kiba la kot sha ka T. 3,986 klur ka pisa ka bym pat lah ban siew sha ki Public Sector Bank, la ong ka kynhun ED.
Hashwa kane, ha u Nailar jong u snem 2022, ka kynhun ED ka la kurup noh ïa 75 tylli ki jingdon jingem ki bym shym la lah ban pynkhih, kynthup ïa ki 67 tylli ki Windmill kiba la kot sha ka T. 113.32 klur baroh, jong ka Surana Group of Companies, kaba don ha Chennai hapoh ka jingtreikam jong ki kyndon jong ka Money Laundering Act.
Ka kynhun ka la pynlong ïa ka jingtohkit ha kaba ïadei bad ka jingdon jong ka pisa ba la klop ha kaba ïadei bad lai tylli ki jingmudui ejhar ba la phah da ka kynhun Central Bureau of Investigation, BF bad SB, ka Bengaluru ka la buh ka jingmudui pyrshah ïa ka M/s Surana Industries Limited bad kiwei pat, ka M/s Surana Power Limited bad kiwei pat, bad ka Surana Corporation Limited bad kiwei pat.
Ha kaba ïadei bad ka jingpynlong ïa ka jingtohkit, la lap ba ki la don kumba 67 tylli ki windmills bad ka jaka kaba T. 51.69 klur bad kiba bun kiwei pat ki jingdon jingem kiba lah ban pynkhih kiba la kot sha ka T. 61.63 klur jong u Shri Ramlal Jain, uba la shah kynnoh donkti ha ka ban pynïaid shakhmat ïa ka kam ha ka jingthmu jong ki lad kamai pisa jong u, ha kaba ka la shah kurup noh hapoh ka jingtreikam jong ka PMLA.
Katkum ka jingshim jingkheiñ, ïa ki Windmill bad ki jingdon jingem ki bym shym la lah ban pynkhih la antad ba ka la long da T. 113.32 klur.
Ka kynhun ED ka la ong ba ha kine ki jingpynlong ïa ki jingtohkit la shem ba kine ki lai tylli ki kompeni kiba kynthup ïa ka Surana Group ki la leh thok ïa ki Bank da kaba ki la donkti ha ka ban leh ïa kane ka kam ha ki kompeni ha kaba ki la thungkam ïa ki nongtrei ne ki bahaïing kum ki Director/ Proprietor bad Partner bad don bynta ha ka ban pynduh noh ïa ki kot kiba la batai shai ïa ka rukom leit ka rukom wan jong ka pisa bad ki khlem da phah ïa ki tiar, ka pisa kaba bun ka a leit sha ki Account jong ki briew kiba kynthup ïa ki Promoter jong ka kompeni da kaba klop ïa ka pisa na kiwei pat ki kompeni.
Na ka jingpynlong ïa ka jingtohkit la lap ba ka Surana Group ka la don ïa ki kompeni ha Cayman Islands bad British Virgin Islands ha ka kyrteng thok jong ki Director bad klop ïa ka pisa ha ka ban buh ha kine ki kompeni.
