Dehradun, Jylliew:
Ki la don kumba 300 ngut ki nongleit jingleit kiba la sahkut lynti ha Pithoragarh distrik jong ka Uttarakhand hadien ka jingjia jong ka jingshah rong noh jong ka surok hadien ka jingtwa khyndew.
Ki nongleit jingleit ki la sakut lynti ha ki bynta jong ka Dharchula bad Gunji hadien ba ka surok Lipulekh-Tawaghat kaba jrong kumba 45 km haneng ka Dharchula, hajan Lakhanpur, ka la shah rong noh ha ka jingjngai kaba 100 meter hadien ba ka la don ka jingtwa jong u lum ha ka surok.
“Ha ki bynta jong ka Pithoragarh, ka surok kali ka Lipulekh-Tawaghat, kaba jrong da kumba 45 km haneng jong ka Dharchula, hajan Lakhanpur, ka la shah rong noh sha ka jingjngai kaba 100 namar ka jingdon jong ka jingtwa khyndew. Ki la don kumba 300 ngut ki briew kiba la sahkut ha ka surok Dharchula bad Gunji,” la ïathuh ka tyllong khubor ha ka jingïakren bad ki nongpynïaid distrik.
Kumba la ïathuh ka kaiphod, la ong ba ïa kane ka surok yn sa plie hadien khyndiat sngi ynda la dep ban pynkhuid lut ïa ka jingtwa.
Ka tnat ba dei khmih ïa ka jinglong jong ka suiñ bneng ka la phah ïa ka jingmaham kaba tyngeh ba kan sa don ka jingbeh jong ka lyer bad ka jinghap jong u slap uba jur ha Almora, Bageshwar, Chamoli, Champawat, Dehradun, Garhwal, Hardwar, Nainital, Pithoragarh, Rudraprayag, Tehri Garhwal, Udham Singh Nagar bad Uttarkashi distrik jong ka jylla.
Ki pulit ki la phah ruh ka jingkyntu bad bthah ïa ki nongleit ïaid riewblei ba kin sah ha ki jaka ba don jingshngaiñ kiba lait na ka jingtwa khyndew.
“Ko ki nongleit ïaid riewblei sah ha ki jaka ba shngaiñ, wat ym mih ban leit jingleit lada dei ka bym da donkam, bad buh bha ïa ki kali ha ki jaka ba shngaiñ, leit jingleit tang lada ka suiñbneng ka rang,” ki la ong. “Baroh ki nongleit jingleit kiba wan na ka bynta ka Yamunotri bad ka Gangotri Dham Yatra ki la shah bthah ba ki dei ban thmu ha ka ban leit jingleit hadien ba la khmih bniah ïa ka jinglong jingman jong ka suiñbneng,” ki la bynrap.
Kumba ka long mynta ki heh ba dei khmih ki dang bteng ïa ka jingpyntreikam na ka bynta ban weng ïa baroh ki jingeh ba kine ki briew ki ïakynduh.
Kumba ka long mynta, la ong ba ki heh ba dei khmih kim pat lah ban pyntikna halor ka jinglong jong ka suiñ bneng bad ka la bthah ïa ki briew ba ki la dei ban long kiba husiar khamtam haba ki donkam ban mih ha ka ban leit jingleit khnang ban lait na kino kino ki jingjia kiba sngewsih ki ba lah ban ktah ïa ki.
