Mumbai, Jylliew:
Ka kynhun Railway Protection Force (RPF) jong ka Central Railway bad ki pulit jong ka Maharashtra ha ka sngi Balang ka la ïoh ban pyllait ïa kumba 59 ngut ki khynnah na ka jingshah khaïi da kaba pynlong ïa ka jingpyntreikam jong ka jingleit khynra ha ka rel Bihar-Pune bad kem ruh ïa san ngut ki briew kiba la shah kynnoh donkti ha ka jingjia, la ïathuh ki heh ka kynhun.
Kine ki khynnah ki la shah pyllait na ka rel Danapur-Pune Special Express ha Bhusawal bad Manmad, kaba don ha Jalgaon bad Nashik distrik, kiba don ha Maharashtra, ki la ong.
“Hadien ba la ïoh jingtip kaba bniah halor kane ka jingjia, ki shipai jong ka tnat RPF ha ryngkat ki pulit jong ka thaiñ bad ki dkhot jong ki nongtrei monsngewbha ki la leit sha katei ka jaka bad pynlong ïa ka jingkhmih bniah ha ka jaka sangeh rel ha Bhusawal. Ki la don baroh kumba 29 ngut khynnah kiba don ha ka rta kaba phra snem bad 15 ïa kiba la shah pyllait. Hadien kane, ki la don sa kumba 30 ngut ki khynnah kiba don ha kajuh ka rta kiba la shah pyllait na ka rel ha Manmad. Ki la don kumba san ngut ki briew kiba la shah kem halor ka jingshah kynnoh ba ki la donkti ha ka kam khaïi briew,” la ong u heh jong ka kynhun RPF.
Kane ka jingpyntreikam ka la long hapoh ka jingtreikam jong ka ‘Operation AAHT’, u la ong.
Katkum ka jingpynlong ïa ka jingtohkit kaba hashwa, la ong ba kine ki khynnah ki dei kiba la wanïalam na Bihar bad phah sha Sangli, la ïathuh u heh shipai, ha kaba u la bynrap shuh shuh da kaba ong ba ki la don kumba san ngut kiba la shah kynnoh donkti ha ka jingjia kiba la shah pynngat ha ki kyndon ba ïadei bad ki kam khaïi briew. Kine kiba la shah kynnoh ki la shah ïalam sha ka ïingbishar, u la ong.
Ha ka jingphah jingthoh lyngba ka Twitter, ka kynhun RPF ka la ong, “ka PRAYAS ha ryngkat ki pulit jong ka jylla ki la ïatreilang na ka bynta ban lah ban ratdyngkhong ïa ki kam khaïi briew, ha kaba kane ka la ïarap ban ïoh pyllait ïa ki 59 ngut ki khynnah da ka jingïohkem ïa ki 5 ngut ki nongkhaïi briew ha ki jaka sangeh rel kiba don ha Bhusawal bad Manmad. Kane ka jingpyntreikam kaba khlaiñbor ka la ïarap na ka bynta ban lah ban ïakhun pyrshah halor ka jingshah pyndonkam bakla.”
